ທ່ານ ເກີງສວງ ໂຄສົກກະຊວງການຕ່າງປະເທດຈີນກ່າວວ່າ: ໃນວັນທີ 10 ສິງຫານີ້, ກຳປັ່ນສະກັດລູກສອນໄຟ USS John S.McCain ຂອງກອງທັບອາເມລິກາໄດ້ເຂົ້າສູ່ເຂດທະເລໃກ້ເກາະທີ່ກ່ຽວຂ້ອງຕາມໝູ່ເກາະນານຊ່າຂອງຈີນຕາມລຳພັງໂດຍບໍ່ໄດຮັບອະນຸມັດຈາກລັດຖະບານຈີນ. ຈາກນັ້ນ ກອງທັບຈີນໄດ້ສົ່ງກຳປັ່ນຮົບໄປກວດກາກຳປັ່ນຂອງອາເມລິກາຕາມກົດໝາຍ ແລະໄດ້ໄລ່ເພື່ອເປັນສັນຍານເຕືອນນຳອີກ. ການກະທຳຂອງກຳປັ່ນຮົບອາເມລິກາໄດ້ລະເມີດກົດໝາຍຂອງຈີນແລະກົດໝາຍສາກົນ ທັງທຳລາຍອະທິປະໄຕແລະຄວາມໝັ້ນຄົງຂອງຈີນຢ່າງໜັກໜ່ວງ ລວມທັງກະທົບຕໍ່ຄວາມປອດໄພດ້ານຊີວິດຂອງເຈົ້າໜ້າທີ່ສອງຝ່າຍຢ່າງໜັກໜ່ວງ. ຈີນສະແດງຄວາມບໍ່ພໍໃຈເປັນທີ່ສຸດຕໍ່ເລື່ອງນີ້ ແລະຈະປະນາມຕໍ່ອາເມລິກາໃຫ້ເຖິງທີ່ສຸດ.
ທ່ານ ເກີງສວງ ກ່າວຕື່ມວ່າ: ການກະທຳທ້າທາຍເກາະຜິດຂອງອາເມລິກາໄດ້ເຮັດໃຫ້ຈີນຈຳເປັນຕ້ອງໄດ້ໃຊ້ມາດຕະການເພື່ອຍົກຄວາມສາມາດການປ້ອງກັນດິນແດນຂອງຕົນໃຫ້ສູງຂຶ້ນຕື່ມອີກ. ຈາກນີ້ຈຶ່ງຮຽກຮ້ອງໃຫ້ອາເມລິກາຄວນເຄົາລົບອະທິປະໄຕແລະຜົນປະໂຫຍດດ້ານຄວາມໝັ້ນຄົງຂອງຈີນຢ່າງແທ້ຈິງ,ເຄົາລົບຄວາມພະຍາຍາມຮ່ວມຂອງປະເທດຢູ່ໃນພາກພື້ນໃນການປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້ຢ່າງແທ້ຈິງ,ບໍ່ຄວນສ້າງເລື່ອງທີ່ທຳລາຍຄວາມໄວ້ເນື້ອເຊື່ອໃຈລະຫວ່າງສອງປະເທດແລະສະຖຽນລະພາບຂອງພາກພື້ນນີ້ອີກ.