ວັນທີ 12 ສິງຫານີ້, ທ່ານ ສີຈິ້ນຜິງ ປະທານປະເທດຈີນໄດ້ສົນທະນາທາງໂທລະສັບກັບທ່ານ ໂດນັນ ທຣຳ ປະທານາທິບໍດີອາເມລິກາ.
ທ່ານ ສີຈິ້ນຜິງ ຊີ້ວ່າ: ຂ້າພະເຈົ້າໄດ້ພົບປະກັບທ່ານປະທານາທິບໍດີຢູ່ເມືອງຮຳເບີກປະເທດເຢຍລະມັນໃນເດືອນກໍລະກົດຜ່ານມາເປັນຢ່າງດີ. ພວກຂ້າພະເຈົ້າໃນຖານະເປັນຜູ້ນຳຂອງຈີນແລະອາເມລິກາ, ການທີ່ຮັກສາການພົວພັນຢ່າງໃກ້ຊິດກ່ຽວກັບບັນຫາທີ່ສົນໃຈຮ່ວມກັນ,ມີຄວາມສຳຄັນຫຼາຍຕໍ່ການຂະຫຍາຍສາຍພົວພັນລະຫວ່າງສອງປະເທດ. ສອງຝ່າຍຄວນສືບຕໍ່ປະຕິບັດຕາມຄວາມເປັນເອກະພາບກັນລະຫວ່າງຂ້າພະເຈົ້າກັບທ່ານປະທານາທິບໍດີ, ເພີ່ມທະວີການປຶກສາຫາລືແລະແລກປ່ຽນກັນ, ຊຸກຍູ້ການແລກປ່ຽນແລະການຮ່ວມມືໃນຂົງເຂດຕ່າງໆ, ແກ້ໄຂບັນຫາທີ່ສົນໃຈຮ່ວມກັນຢ່າງເໝາະສົມ,ຊຸກຍູ້ສາຍພົວພັນລະຫວ່າງສອງປະເທດໃຫ້ຂະຫຍາຍຕົວໄປໜ້າຢ່າງປອດໃສ່ແລະໝັ້ນທ່ຽງ. ຈີນໃຫ້ຄວາມສຳຄັນຕໍ່ການທີ່ທ່ານປະທານາທິບໍດີຈະຢ້ຽມຢາມຈີນທາງລັດຖະກິດໃນປີນີ້,ຄະນະເຮັດວຽກຂອງສອງປະເທດຄວນພະຍາຍາມຮ່ວມກັນເພື່ອເຮັດວຽກກະກຽມໃຫ້ດີ.
ທ່ານ ໂດນັນ ທຣຳ ກ່າວວ່າ: ຂ້າພະເຈົ້າຮູ້ສຶກດີໃຈຫຼາຍທີ່ໄດ້ສົນທະນາທາງໂທລະສັບກັບທ່ານປະທານສີຈິ້ນຜິງຫຼັງການພົບປະຢູ່ເມືອງຮຳເບີກ. ຂ້າພະເຈົ້າຮັກສາການພົວພັນແລະປະສານງານກັບທ່ານປະທານສີຈິ້ນຜິງກ່ຽວກັບບັນຫາທີ່ສຳຄັນ ແລະ ສອງປະເທດເພີ່ມທະວີການໄປມາຫາສູ່ກັນລະຫວ່າງການນຳຂັ້ນຕ່າງໆໃນຂົງເຂດຕ່າງໆນັ້ນມີຄວາມສຳຄັນຫຼາຍ. ປັດຈຸບັນ, ສາຍພົວພັນລະຫວ່າງອາເມລິກາ-ຈີນໄດ້ມີທ່າອ່ຽງພັດທະນາທີ່ດີ, ຂ້າພະເຈົ້າເຊື່ອວ່າຈະສາມາດພັດທະນາໄດ້ດີກວ່າເກົ່າ. ຂ້າພະເຈົ້າຄອງຄອຍເດີນທາງຢ້ຽມຢາມຈີນທາງລັດຖະກິດ.
ນອກນີ້, ປະມຸກລັດຂອງສອງປະເທດຍັງໄດ້ແລກປ່ຽນຄວາມຄິດຄວາມເຫັນກ່ຽວກັບສະຖານະການຢູ່ແຫຼມເກົາຫຼີໃນປັດຈຸບັນ. ທ່ານ ສີຈິ້ນຜິງ ກ່າວເນັ້ນວ່າ: ຈີນແລະອາເມລິກາມີຜົນປະໂຫຍດຮ່ວມໃນການເຮັດໃຫ້ແຫຼມເກົາຫຼີປອດນິວເຄລຍ,ປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ. ປັດຈຸບັນ, ຝ່າຍທີ່ກ່ຽວຂ້ອງຄວນຮັກສາຄວາມອົດກັ້ນໄວ້, ຫຼີກເວັ້ນບໍ່ໃຫ້ສະຖານະການຢູ່ແຫຼມເກົາຫຼີຮ້າຍແຮງຂຶ້ນຕື່ມ. ທ່ານ ໂດນັນ ທຣຳ ກ່າວວ່າ: ອາເມລິກາມີຄວາມເຂົ້າໃຈຢ່າງເຕັມສ່ວນຕໍ່ຈີນທີ່ເສີມຂະຫຍາຍບົດບາດໃນບັນຫານິວເຄລຍຂອງແຫຼມເກົາຫຼີ, ອາເມລິກາຍິນດີຮັກສາການພົວພັນກັບຈີນຢ່າງໃກ້ຊິດກ່ຽວກັບບັນຫາສາກົນແລະພາກພື້ນທີ່ສຳຄັນແລະສົນໃຈຮ່ວມກັນ.