ວັນທີ 12 ສິງຫານີ້, ທ່ານອານໂດນີໂອ ກູເຕເຣສ, ເລຂາທິການໃຫຍ່ອົງການສະຫະປະຊາຊາດໄດ້ຮຽກຮ້ອງໃຫ້ຜູ້ນຳການເມືອງທີ່ກ່ຽວຂ້ອງຂອງເຄນຢາແກ້ໄຂຄວາມຂັດແວ້ງກ່ຽວກັບການເລືອກຕັ້ງປະທານາທິບໍດີດ້ວຍຊ່ອງທາງທີ່ຊອບດ້ວຍກົດໝາຍ. ທັງເຕືອນໃຫ້ຜູ້ນຳການເມືອງເຫຼົ່ານີ້ສົ່ງຂ່າວຢ່າງຈະແຈ້ງຕໍ່ຜູ້ສະໜັບສະໜູນຂອງຕົນວ່າບໍ່ໃຊ້ຄວາມຮຸນແຮງ.
ທັງນີ້, ທ່ານອານໂດນີໂອ ກູເຕເຣສໄດ້ຜ່ານໂຄສົກຂອງຕົນອອກຖະແຫຼງການດ້ວຍໂຄສົກ, ໃນວັນດັ່ງກ່າວວ່າຕົນໄດ້ຮູ້ຜົນການເລືອກຕັ້ງປະທານາທິບໍດີຂອງເຄນຢາແລ້ວແລະຮຽກຮ້ອງໃຫ້ຜູ້ນຳການເມືອງທີ່ມີຄວາມຂັດແຍ້ງກັນຕໍ່ຜົນການເລືອກຕັ້ງນັ້ນແກ້ໄຂບັນຫາໂດຍຜ່ານອົງການທີ່ໄດ້ຮັບສິດຈາກລັດຖະທຳມະນູນ, ແລະຫວັງວ່າຜູ້ນຳການເມືອງເຫຼົ່ານີ້ສົ່ງຂ່າວສານຢ່າງຈະແຈ້ງຕໍ່ຜູ້ສະໜັບສະໜູນຂອງຕົນວ່າບໍ່ໃຊ້ຄວາມຮຸນແຮງ.
ການເລືອກຕັ້ງປະທານາທິບໍດີເຄນຢາໄດ້ຈັດຂຶ້ນໃນວັນທີ 8 ສິງຫານີ້. ໂດຍຜົນການນັບບັດສະແດງໃຫ້ເຫັນວ່າທ່ານອູຮູຣູ ເຄນຢາຕາ, ປະທານາທິບໍດີຄົນປັດຈຸບັນໄດ້ຮັບໄຊຊະນະ, ແລະຈະດຳລົງຕຳແໜ່ງປະທານາທິບໍດີອີກວາລະໜຶ່ງ. ຫຼັງປະກາດຜົນການນັບບັດ, ມີຜູ້ສະໜັບສະໜູນພັກຝ່າຍຄ້ານຈຳນວນໜຶ່ງໄດ້ກໍ່ການປະທ້ວງ, ແລະຢູ່ເຂດພາກຕາເວັນຕົກຂອງເຄນຢາເກີດເຫດການຄວາມຮຸນແຮງ, ສົ່ງຜົນເຮັດໃຫ້ມີຄົນເສຍຊີວິດແລະບາດເຈັບ.
