ຕອນເຊົ້າວັນທີ 13 ສິງຫານີ້, ຢູ່ເຂດທະເລພາກຕາເວັນຕົກແຂວງເບງກູລູ ເກາະສຸມາຕຣາ ປະເທດອິນໂດເນເຊຍ ໄດ້ເກີດແຜ່ນດິນໄຫວລະດັບ 6,6 ລິກເຕີ ໂດຍມາຮອດປັດຈຸບັນຍັງບໍ່ທັນມີລາຍງານຂ່າວກ່ຽວກັບຜູ້ເສຍຊີວິດ ຫຼື ບາດເຈັບ ແລະ ຄວາມເສຍຫາຍທາງຊັບສິນເທື່ອ.
ແຫຼ່ງຂ່າວຈາກເວັບໄຊອົງການອຸຕິນິຍົມ, ດິນຟ້າອາກາດ ແລະ ຟິຊິກໂລກ ປະເທດອິນໂດເນເຊຍ ໃຫ້ຮູ້ວ່າ: ແຜ່ນດິນໄຫວໄດ້ເກີດຂຶ້ນໃນເວເລ10:08 ໂມງຕາມເວລາຂອງລາວ ໂດຍສູນກາງແຜ່ນດິນໄຫວຢູ່ເຂດທະເລຫ່າງຈາກເມືອງເບງກູລູເໜືອ ແຂວງເບງກູລູໄປທາງທິດຕາເວັນຕົກສຽງໃຕ້ 71 ກິໂລແມັດ ແລະເລິກລົງໃຕ້ດິນ 10 ກິໂລແມັດ. ແນວໃດກໍດີ, ອົງການຕິດຕາມວັດແທກແຜ່ນດິນໄຫວອິນໂດເນເຊຍບໍ່ໄດ້ສົ່ງສັນຍານເຕືອນໄພຄື້ນສຶນາມິຈາກເຫດແຜ່ນດິນໄຫວເທື່ອນີ້.
ຂະນະທີ່ອົງການສຳຫຼວດທໍລະນີສາດອາເມລິກາວັດແທກໄດ້ລະດັບແຜ່ນດິນໄຫວເທື່ອນີ້ຢູ່ໃນຂັ້ນ 6,4 ລິກເຕີ ແລະເລິກລົງໃຕ້ດິນ 35,9 ກິໂລແມັດ.
