ແຫຼ່ງຂ່າວຈາກຫ້ອງການຖະແຫຼງຂ່າວອຳນາດການປົກຄອງແຂວງເສສວນ ສປ ຈີນ ໃຫ້ຮູ້ໃນວັນທີ 14 ສິງຫານີ້ວ່າ: ມາຮອດເວລາ 20:00 ໂມງຂອງວັນທີ 13 ສິງຫານີ້, ແຜ່ນດິນໄຫວຢູ່ຈິວຈ້າຍໂກ່ວ "ວັນທີ 8 ສິງຫາ" ໄດ້ສົ່ງຜົນເຮັດໃຫ້ 25 ຄົນເສຍຊີວິດ ແລະ 525 ບາດເຈັບ ແລະປັດຈຸບັນ, ການຊອກຄົ້ນແລະຊ່ວຍເຫຼືອຜູ້ປະສົບໄພ ໄດ້ສິ້ນສຸດລົງໂດຍພື້ນຖານແລ້ວ.
ໃນຈຳນວນຜູ້ເສຍຊີວິດ 25 ຄົນນັ້ນ ມີ 24 ຄົນໄດ້ຮັບການສັນລະສູດແລ້ວ, ຂະນະທີ່ 525 ຄົນທີ່ບາດເຈັບນັ້ນ, ມີ 42 ຄົນເຈັບສາຫັດ ແລະນອກນີ້ຍັງມີ 6 ຄົນຫາຍສາບສູນ.
ແຜ່ນດິນໄຫວເທື່ອນີ້ໄດ້ກະທົບເຖິງ 19.768 ຄອບຄົວ ຫຼື 176. 492 ຄົນ ລວມທັງນັກທ່ອງທ່ຽວ, ເຮືອນ 73.671 ຫຼັງຖືກທຳລາຍ, ໃນນັ້ນພັງທະລາຍ 76 ຫຼັງ, 4 ເມືອງ, 53 ຕາແສງແລະ 309 ບ້ານຖືກກະທົບ, ຂະນະທີ່ຢູ່ເມືອງຜິງອູທີ່ຂຶ້ນກັບເມືອງໝຽນຢາງ ມີ 11 ຕາແສງໄດ້ຮັບຜົນກະທົບ ແລະ ປັດຈຸບັນກຳລັງກວດກາຜົນເສຍຫາຍ.
ຂ່າວລາຍງານຕື່ມອີກວ່າ: ປັດຈຸບັນ, ການຊອກຄົ້ນແລະຊ່ວຍເຫຼືອຜູ້ປະສົບໄພໄດ້ສິ້ນສຸດລົງໂດຍພື້ນຖານ ໂດຍປະຊາຊົນຜູ້ປະສົບໄພໄດ້ຮັບການຈັດສັນຊົ່ວຄາວ, ຂະນະທີ່ນັກທ່ອງທ່ຽວ ແລະ ຄົນຕ່າງຖິ່ນທີ່ໄປເຮັດວຽກຢູ່ເຂດປະສົບໄພນັ້ນກໍໄດ້ນຳອອກມາໝົດແລ້ວ, ຂະນະທີ່ເສັ້ນທາງ, ການສື່ສານ, ໄຟຟ້າແລະນ້ຳ ກໍໄດ້ຮັບການຟື້ນຟູໂດຍພື້ນຖານ.
