ທ່ານຕັນ ຊຣີ ບາເຊີ ອາມັດ ຫົວໜ້າເຈົ້າໜ້າທີ່ບໍລິຫານງານບໍລິສັດສະໜາມບິນມາເລເຊຍຫຸ້ນສ່ວນຈຳກັດເປີດເຜີຍຢູ່ກົວລາລຳເປີໃນວັນທີ 11 ສິງຫານີ້ວ່າ, ເພື່ອຕ້ອນຮັບນັກທ່ອງທ່ຽວຈີນທີ່ນັບມື້ຫຼາຍຂຶ້ນ, ສະໜາມບິນສາກົນກົວລາລຳເປີ 1 ແລະ 2 ປະເທດມາເລເຊຍຈະຈັດໃຫ້ມີບ່ອນສອບຖາມເປັນພາສາຈີນໃນຕົ້ນເດືອນໜ້າ.
ທ່ານກ່າວຕື່ມວ່າ, ເຈົ້າໜ້າທີ່ບ່ອນສອບຖາມຈະຕອບຄຳຖາມກ່ຽວກັບການເຊັນວິຊາ, ຈອງໂຮງແຮມແລະບັນຫາອື່ນໆ ເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວຈີນ ແລະກ້າວໄປສູ່ການບັນລຸເປົ້າໝາຍດຶງດູດນັກທ່ອງທ່ຽວຈີນໄປທ່ຽວມາເລເຊຍໃຫ້ໄດ້ 8 ລ້ານຄົນເມື່ອຮອດປີ 2020.
ຂ່າວແຈ້ງວ່າ, ນັກທ່ອງທ່ຽວຈີນທີ່ໄປທ່ຽວມາເລເຊຍໃນປີ 2016 ມີຫຼາຍກວ່າ 2 ລ້ານ 1 ແສນເທື່ອຄົນ ແລະເພີ່ມຂຶ້ນ 26% ທຽບໃສ່ປີ 2015 ເຊິ່ງນັບວ່າເປັນສະຖິຕິສູງສຸດໃນປະຫວັດສາດ. ຂະນະທີ່ທ່ານຮວງຮຸ້ຍຄ່າງ ເອກອັກຄະລັດຖະທູດຈີນປະຈຳມາເລເຊຍເຄີຍກ່າວວ່າ, ຈີນຈະເພີ່ມທະວີການຮ່ວມມືໃນຂົງເຂດທ່ອງທ່ຽວກັບມາເລເຊຍໃນປີ 2017 ຕື່ມອີກ ແລະຫວັງໃຫ້ນັກທ່ອງທ່ຽວຈີນທີ່ໄປທ່ຽວປະເທດດັ່ງກ່າວຫຼາຍກວ່າ 3 ລ້ານເທື່ອຄົນໃນປີນີ້.
 |
