ພິທີລະນຶກວັນປະກາດເອກະລາດປາກິສຖານຄົບຮອບ 70 ປີໄດ້ຈັດຂຶ້ນຢູ່ນະຄອນຫຼວງອິສລາມາບັດ ປະເທດດັ່ງກ່າວໃນວັນທີ 14 ສິງຫານີ້ ໂດຍທ່ານມຳນູນ ຮູເຊອິນ ປະທານາທິບໍດີ, ທ່ານຊາຮິດ ຄາການ ອັບບາຊີ ນາຍົກລັດຖະມົນຕີ ແລະ ບຸກຄົນໃນວົງການຕ່າງໆຂອງປະເທດດັ່ງກ່າວ ພ້ອມດ້ວຍທູຕານຸທູດປະເທດຕ່າງໆປະຈຳປາກິສຖານ ເກືອບພັນທ່ານເຂົ້າຮ່ວມ.
ທ່ານວ່າງຢາງ ຮອງນາຍົກລັດຖະມົນຕີຈີນກ່າວໃນໂອກາດເຂົ້າຮ່ວມພິທີດັ່ງກ່າວວ່າ: ຈີນ ແລະ ປາກິສຖານເປັນເພື່ອນມິດທີ່ມີສັດຈະ ແລະ ຊ່ວຍເຫຼືອກັນເພື່ອຜ່ານຜ່າຄວາມຫຍຸ້ງຍາກ ເຊິ່ງບໍ່ພຽງເປັນມິດກັນພຽງແຕ່ເຊັ່ນຄົນດຽວເທົ່ານັ້ນ ຫາກຍັງຈະສືບທອດກັນທຸກເຊັ່ນຄົນອີກດ້ວຍ. ບໍ່ວ່າສະພາບແວດລ້ອມສາກົນຈະປ່ຽນແປງແນວໃດ ແລະ ບໍ່ວ່າຈີນຈະພັດທະນາແນວໃດກໍຕາມ, ຈີນກໍຈະເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ຄູ່ຮ່ວມທີ່ດີ ແລະ ອ້າຍນ້ອງທີ່ດີຂອງປາກິສຖານ.
ຈີນຍິນດີເພີ່ມທະວີການຮ່ວມມືທາງຍຸດທະສາດ, ການຮ່ວມມືດ້ານເສດຖະກິດ, ການແລກປ່ຽນດ້ານວັດທະນະທຳກັບປາກິສຖານຢ່າງຮອບດ້ານ ເປີດກວ້າງການຮ່ວມມືໃນຂົງເຂດຕ່າງໆລະຫວ່າງສອງຝ່າຍ ແລະເຮັດໃຫ້ປະຊາຊົນສອງຊາດສາມັກຄີຮັກແພງກັນຢ່າງແໜ້ນແຟ້ນຍິ່ງຂຶ້ນ.