ວັນທີ 14 ສິງຫານີ້, ທ່ານອັນໂດນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ຫຼື UN ໄດ້ສະແດງຄວາມເສົ້າສະຫຼົດໃຈຕໍ່ຜູ້ເສຍຊີວິດຈາກອຸທົກກະໄພ ແລະ ນ້ຳພູໄຫຼຊຸທັ່ງເຮັດໃຫ້ດິນເຈື່ອນ.
ທ່ານຟາຮັນ ຮັກ ຮອງໂຄສົກເລຂາທິການໃຫຍ່ UN ໄດ້ກ່າວຫຼັງມີການຖະແຫຼງການວ່າ: ທ່ານກູເຕີເຣັສ ໄດ້ສະແດງຄວາມເຫັນໃຈຕໍ່ລັດຖະບານແລະປະຊາຊົນເຊຣາລີໂອນ ທີ່ປະສົບຄວາມເສຍຫາຍທັງຊີວິດແລະຊັບສິນຈາກໄພພິບັດເທື່ອນີ້. ຂະນະດຽວກັນ, ທ່ານຍັງຢ້ຳຄືນວ່າ UN ຈະສຸມກຳລັງສະໜັບສະໜູນການກູ້ໄພຊ່ວຍລັດຖະບານແລະປະຊາຊົນເຊຣາລີໂອນ.
ຂ່າວລາຍງານວ່າ: ຕອນຮຸ່ງເຊົ້າວັນທີ 14 ສິງຫານີ້ຕາມເວລາທ້ອງຖິ່ນ, ຢູ່ນະຄອນຫຼວງຟຣີທາວ ພ້ອມດ້ວຍເຂດອ້ອມຂ້າງ ປະເທດເຊຣາລີໂອນ ໄດ້ເກີດອຸທົກກະໄພ ແລະນ້ຳພູໄຫຼຊຸທັ່ງເຮັດໃຫ້ດິນເຈື່ອນ ເນື່ອງຈາກຝົນຕົກໜັກ ສົ່ງຜົນເຮັດໃຫ້ເຮືອນຈຳນວນຫຼາຍຖືກທຳລາຍ ແລະປັດຈຸບັນ, ມີຜູ້ເສຍຊີວິດແລ້ວ 300 ກວ່າຄົນ.