ທ່ານຮາຊັນ ຣູຮານີ ປະທານາທິບໍດີອີຣານ ໄດ້ປາໄສຢູ່ນະຄອນຫຼວງເຕເຮລານ ໃນວັນທີ 15 ສິງຫານີ້ ໂດຍກ່າວດ້ວຍທາງອ້ອມວ່າ: ຖ້າອາເມລິກາສືບຕໍ່ໃຊ້ມາດຕະການຂວ້ຳບາດ, ປະເທດຕົນກໍອາດຈະຖອນອອກຈາກສັນຍານິວເຄລຍອີຣານຮອບດ້ານ.
ເດືອນກໍລະກົດປີ 2015, ອີຣານ ແລະ 6 ປະເທດກ່ຽວກັບບັນຫານິວເຄລຍອີຣານ ຄື ອາເມລິກາ, ອັງກິດ, ຝຣັ່ງ, ຣັດເຊຍ, ຈີນ ແລະ ເຢຍລະມັນ ໄດ້ບັນລຸການເຊັນສັນຍານິວເຄລຍອີຣານຮອບດ້ານ ແລະການຂວ້ຳບາດອີຣານຈາກສາກົນກໍຖືກຍົກເລີກ. ແນວໃດກໍດີ, ນັບແຕ່ປີນີ້ເປັນຕົ້ນມາ, ອາເມລິກາໄດ້ອ້າງວ່າອີຣານພັດທະນາຂີປະນາວຸດ ຈຶ່ງໄດ້ໃຊ້ຫຼາຍມາດຕະການຂວ້ຳບາດອີກ ໂດຍສະເພາະຫຼັງອີຣານເຊັນສັນຍານິວເຄລຍແລ້ວ, ອາເມລິກາກໍບໍ່ໄດ້ຍົກເລີກການຂວ້ຳບາດການເງິນ ສົ່ງຜົນເຮັດໃຫ້ບໍລິສັດຕາເວັນຕົກບໍ່ກ້າໄປລົງທຶນຢູ່ປະເທດດັ່ງກ່າວ ຈຶ່ງເຮັດໃຫ້ສັນຍານິວເຄລຍອີຣານທີ່ມີຜົນທາງບວກໄດ້ຫຼຸດໜ້ອຍລົງ.