ໜຶງສືພິມ "ຈາກາຕາພົສທ໌" ສະບັບວັນທີ 15 ສິງຫານີ້ຂອງອິນໂດເນເຊຍ ລາຍງານວ່າ: ອົງການສະຖິຕິສູນກາງຈະຮ່ວມກັບສະມາຄົມການຄ້າເອເລັກໂຕຣນິກປະເທດຕົນຄົ້ນຄວ້າການເກັບກຳຕົວເລກຂໍ້ມູນຂະແໜງການຄ້າເອເລັກໂຕຣນິກ.
ທ່ານຊູຢາມິນ ຫົວໜ້າອົງການສະຖິຕິສູນກາງອິນໂດເນເຊຍ ກ່າວວ່າ: ຄຽງຄູ່ກັບການພັດທະນາການຂາຍຍ່ອຍອອນລາຍ, ອົງການຕົນໄດ້ເລີ່ມຄົ້ນຄວ້າສະພາບການປ່ຽນແປງຂອງຮູບແບບການບໍລິໂພກຂອງປະຊາຊົນ, ແຕ່ການເກັບກຳຕົວເລກດັ່ງກ່າວເປັນເລື່ອງຍາກ ແລະສະມາຄົມການຄ້າເອເລັກໂຕຣນິກ ກໍບໍ່ມີຕົວເລກຂໍ້ມູນທີ່ກ່ຽວຂ້ອງ. ສະນັ້ນ, ອົງການຕົນຈະຮ່ວມກັບສະມາຄົມດັ່ງກ່າວສຶກສາຄົ້ນຄວ້າຊ່ອງທາງ ແລະ ວິທີຕ່າງໆເພື່ອສາມາດເກັບກຳຕົວເລກດັ່ງກ່າວ.
ປັດຈຸບັນ, ສະມາຄົມການຄ້າເອເລັກໂຕຣນິກອິນໂດເນເຊຍມີ 287 ສະມາຊິກ ລວມທັງເວັບໄຊຂອງຫຼາຍບໍລິສັດການຄ້າເອເລັກໂຕຣນິກຂະໜາດໃຫຍ່, ຂະນະທີ່ຮູບແບບຈຳໜ່າຍສິນຄ້າທາງເວັບໄຊບໍລິສັດການຄ້າເອເລັກໂຕຣນິກຖືກເອີ້ນວ່າ "ການຄ້າເອເລັກໂຕຣນິກເປັນທາງການ" ແລະ ຈຳໜ່າຍສິນຄ້າຜ່ານສື່ສັງຄົມອອນລາຍກໍຖືກເອີ້ນວ່າ "ການຄ້າເອເລັກໂຕຣນິກບໍ່ເປັນທາງການ" ສຳລັບສອງຮູບແບບດັ່ງກ່າວນີ້, ການເກັບກຳຕົວເລກຂໍ້ມູນໃນຮູບແບບທຳອິດຈະງ່າຍກວ່າ.
