ວັນທີ 15 ສິງຫານີ້, ອົງການກອງທຶນເງິນຕາສາກົນຫຼື IMF ກ່າວຫຼັງໄດ້ສຳເລັດການປຶກສາຫາລືດ້ານເສດຖະກິດແລະນະໂຍບາຍປະຈຳປີກັບຈີນວ່າ: ເສດຖະກິດຈີນໄດ້ສືບຕໍ່ພັດທະນາໄປຕາມທິດທາງທີ່ພັດທະນາແບບຍືນຍົງກວ່າເກົ່າ, ປະສົບຜົນສຳເລັດໃນການປະຕິຮູບຂົງເຂດຕ່າງໆ ແລະຈາກນີ້ຈຶ່ງຄາດວ່າປີນີ້ຈີນຈະຮັກສາຈັງຫວະການເຕີບໂຕທາງເສດຖະກິດຢ່າງເຂັ້ມແຂງໃນລະດັບ 6,7%.
ປີນີ້, IMF ໄດ້ປັບຄາດໝາຍຄວາມໄວການເຕີບໂຕຂອງເສດຖະກິດຈີນຫຼາຍເທື່ອ ແລະຄະນະກຳມະການບໍລິຫານງານຂອງ IMF ກໍກ່າວຊົມເຊີຍຈີນທີ່ປະສົບຜົນສຳເລັດໃນການຊຸກຍູ້ການຫັນປ່ຽນຮູບແບບເສດຖະກິດມາສູ່ການບໍລິການແລະການບໍລິໂພກຢ່າງຕໍ່ເນື່ອງ ແລະການບັນລຸຄວາມດຸ່ນດ່ຽງຂອງເສດຖະກິດຕື່ມອີກ ໂດຍເຫັນວ່າການທີ່ເສດຖະກິດຈີນເພີ່ມຂຶ້ນຢ່າງແຂງແຮງແລະຕໍ່ເນື່ອງນັ້ນຖືວ່າເປັນການສະໜັບສະໜູນທີ່ສຳຄັນຕໍ່ຄວາມຕ້ອງການຂອງໂລກ.
IMF ສະແດງຄວາມຊົມເຊີຍລັດຖະບານຈີນທີ່ໄດ້ເອົາໃຈໃສ່ແລະຫຼຸດຄວາມສ່ຽງດ້ານການເງິນ ທັງເຫັນດີທີ່ຈີນພະຍາຍາມຫຼຸດຄວາມສາມາດດ້ານການຜະລິດທີ່ເກີນຄວາມຕ້ອງການໃຫ້ໜ້ອຍລົງ. ຂະນະດຽວກັນກໍໄດ້ສະເໜີໃຫ້ຈີນເພີ່ມຂອບເຂດຫຼຸດຄວາມສາມາດດ້ານການຜະລິດທີ່ເກີນຄວາມຕ້ອງການພ້ອມທັງອາໄສກຳລັງຂອງຕະຫຼາດໃຫ້ຫຼາຍກວ່າເກົ່າ.