ຂະນະທີ່ອາເມລິກາແລະສປປເກົາຫຼີຕ່າງກ່າວທ້າທາຍກັນສົ່ງຜົນເຮັດໃຫ້ສະຖານະການໃນແຫຼມເກົາຫຼີດຸເດືອດຂຶ້ນນັ້ນ, ວັນທີ 15 ສິງຫານີ້, ທ່ານເຣກສ໌ ຕີເລີຊັນ ລັດຖະມົນຕີກະຊວງການຕ່າງປະເທດອາເມລິກາເປີດເຜີຍວ່າ, ອາເມລິກາພ້ອມທີ່ຈະເຈລະຈາກັບສປປເກົາຫຼີ ກ່ຽວກັບບັນຫານິວເຄຼຍແຫຼມເກົາຫຼີ, ແຕ່ຈະເປັນໄປໄດ້ຫຼືບໍ່ ນັ້ນກໍຂຶ້ນກັບການຕັດສິນໃຈຂອງທ່ານກິມຈົງອຸນ ຜູ້ນຳສປປເກົາຫຼີ.
ທ່ານຕີເລີຊັນ ລັດຖະມົນຕີກະຊວງການຕ່າງປະເທດແລະທ່ານເຈມສ໌ ມາຕິສ໌ ລັດຖະມົນຕີກະຊວງປ້ອງກັນປະເທດອາເມລິກາໄດ້ຮ່ວມກັນພິມບົດຄວາມລົງນາມໃນໜັງສືພິມ "ໂວນສຕຣິດລາຍວັນ" ໂດຍຂຽນວ່າ, ວິທີທາງການທູດເປັນວິທີບຸລິມະສິດສຳລັບອາເມລິກາທີ່ຈະເຮັດໃຫ້ສປປເກົາຫຼີປ່ຽນແປງທິດທາງຂອງຕົນ ແລະການທີ່ອາເມລິກາກົດດັນບັນຫາສັນຕິພາບຕໍ່ສປປເກົາຫຼີ ກໍເພື່ອເຮັດໃຫ້ແຫຼມເກົາຫຼີປອດນິວເຄຼຍ ທັງບໍ່ມີເຈດຕະນາປ່ຽນແປງອຳນາດການປົກຄອງສປປເກົາຫຼີ ຫຼືເລັ່ງຂະບວນການໂຮມເຂົ້າເປັນເອກະພາບກັນຂອງສປປເກົາຫຼີແລະສ.ເກົາຫຼີເປັນປະເທດໜຶ່ງດຽວ, ນອກນີ້ ບໍ່ມີເຈດຕະນາຫາຂໍ້ອ້າງເອົາທະຫານໄປປະຈຳຢູ່ພາກເໜືອເຂດປອດທະຫານ ແລະບໍ່ມີເຈດຕະນາທຳຮ້າຍປະຊາຊົນສປປເກົາຫຼີແຕ່ປະການໃດ.