ເຈົ້າໜ້າທີ່ຕຳຫຼວດຟິລິບປິນເປີດເຜີຍໃນວັນທີ 15 ສິງຫານີ້ວ່າ, ໄດ້ດຳເນີນການປາບປາມຢາເສບຕິດຫຼາຍເທື່ອຢູ່ແຂວງບູລາຄັນທີ່ຫ່າງຈາກນະຄອນຫຼວງມະນີລາໄປທາງທິດເໜືອວັນທີ 14 ສິງຫານີ້ ແລະມາຮອດປັດຈຸບັນ, ສາມາດຍິງຜູ້ຄ້າຂາຍແລະຜູ້ເສບຢາເສບຕິດ 21 ຄົນ ແລະຈັບໄດ້ 64 ຄົນ.
ເຈົ້າໜ້າທີ່ຕຳຫຼວດແຂວງບູລາຄັນກ່າວວ່າ, ການເຄື່ອນໄຫວດັ່ງກ່າວໄດ້ເລີ່ມແຕ່ຕອນຄ່ຳວັນທີ 14 ສິງຫານີ້ ແລະໄດ້ສືບຕໍ່ຈົນຮອດຕອນຄ່ຳຂອງມື້ຖັດມາ ແລະ ມາຮອດປັດຈຸບັນ ໄດ້ເຄື່ອນໄຫວໃນລັກສະນະນີ້ຢູ່ທົ່ວແຂວງ 24 ເທື່ອແລ້ວ ໂດຍໃນໄລຍະດັ່ງກ່າວ, ກຸ່ມຢາເສບຕິດໄດ້ຝ່າຝືນການຈັບ ແລະຍິງປະທະກັບຕຳຫຼວດ ໂດຍມີຜູ້ກ່ຽວພັນກັບຢາເສບຕິດ 21 ຄົນຖືກຍິງຕາຍ. ນອກນັ້ນ, ຕຳຫຼວດຍັງສາມາດຍຶດປືນສັ້ນ, ປືນລ່າສັດແລະອາວຸດອື່ນໆໄດ້ຫຼາຍລາຍການ.
ເວັບໄຊຕຳຫຼວດແຫ່ງຊາດຟິລິບປິນເປີດເຜີຍວ່າ, ນັບແຕ່ເດືອນກໍລະກົດປີຜ່ານມາຮອດເດືອນກໍລະກົດປີນີ້, ຕຳຫຼວດຟິລິບປິນໄດ້ເຄື່ອນໄຫວປາບປາມຢາເສບຕິດ 68.000 ເທື່ອ ໂດຍສາມາດຈັບໄດ້ 96.000 ຄົນ ແລະ 3000 ກວ່າຄົນຖືກຍິງຕາຍຍ້ອນຝ່າຝືນຕໍ່ການຈັບ.