ເລຂາທິການໃຫຍ່ ສປຊ ເນັ້ນຄວນແກ້ໄຂບັນຫານິວເຄຼຍແຫຼມເກົາຫຼີດ້ວຍການເມືອງ

ທ່ານອັນໂຕນິໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດກ່າວໃນວັນທີ 16 ສິງຫານີ້ວ່າ, ບັນຫານິວເຄຼຍແຫຼມເກົາຫຼີຄວນແກ້ໄຂດ້ວຍການເມືອງ.

ທ່ານ ກູເຕີເຣັສ ກ່າວວ່າ, "ວິທີທາງການເມືອງແມ່ນໜຶ່ງທາງອອກແກ້ໄຂວິກິດການດັ່ງກ່າວ", ແລະສະພາຄວາມໝັ້ນຄົງອົງການສະຫະປະຊາຊາດໄດ້ຮ່ວມກັນຮັບຮອງເອົາມະຕິເລກທີ  2371, "ໄດ້ສ້າງໂອກາດໃຫ້ແກ່ການຕິດຕໍ່ພົວພັນທາງການທູດແລະຟື້ນຟູການເຈລະຈາເພື່ອແກ້ໄຂວິກິດການ".

ທ່ານກູເຕີເຣັສໄດ້ ຮຽກຮ້ອງໃຫ້ຝ່າຍຕ່າງໆຈົ່ງຮັກສາຄວາມອົດກັ້ນ, ຂະນະດຽວກັນກໍໃຫ້ຄຳໝັ້ນສັນຍາວ່າຈະຮັກສາການພົວພັນຢ່າງໃກ້ຊິດກັບຝ່າຍຕ່າງໆ, ແລະພ້ອມຈະຊ່ວຍເຫຼືອດ້ວຍຮູບການຕ່າງໆທຸກເວລາ. ນອກນີ້ກໍຫວັງວ່າບັນດາຝ່າຍທີ່ກ່ຽວຂ້ອງຈະເພີ່ມຄວາມໄວ້ເນື້ອເຊື່ອໃຈກັນແລະປະຕິບັດບາດກ້າວຢ່າງຕັ້ງໜ້າ, ເພື່ອບັນລຸການປອດອາວຸດນິວເຄຼຍແຫຼມເກົາຫຼີ.