ກະຊວງການຕ່າງປະເທດຣັດເຊຍຊີ້ ການຊ້ອມຮົບກັບອິນເດຍບໍ່ມີສ່ວນພົວພັນກັບສະພາບລະຫວ່າງຈີນ-ອິນເດຍໃນປັດຈຸບັນ

ວັນທີ 17 ສິງຫານີ້, ທ່ານນາງ ມາເຣຍ ຈັກຮາໂຣວາ ໂຄສົກກະຊວງການຕ່າງປະເທດຣັດເຊຍກ່າວວ່າ: ຈາກກໍລະນີທີ່ວ່າການຊ້ອມຮົບລະຫວ່າງຣັດເຊຍ-ອິນເດຍພົວພັນກັບສະພາບການພົວພັນລະຫວ່າງຈີນ-ອິນເດຍໃນປັດຈຸບັນນັ້ນແມ່ນບໍ່ມີຄວາມເປັນຈິງ.

ທ່ານນາງ ມາເຣຍ ຈັກຮາໂຣວາ ໃຫ້ສຳພາດຕໍ່ນັກຂ່າວສຳນັກຂ່າວສານຊິນຮວາໃນການຖະແຫຼງຂ່າວວ່າ: ການຊ້ອມຮົບຮ່ວມອິນດຣາ 2017 ລະຫວ່າງຣັດເຊຍ-ອິນເດຍທີ່ຈະຈັດຂຶ້ນຢູ່ເຂດທະຫານທາງພາກຕາເວັນອອກຂອງຣັດເຊຍໃນເດືອນຕຸລາປີນີ້ ເຊິ່ງເປັນການຊ້ອມຮົບປະຈຳປີ, ສະນັ້ນການທີ່ວ່າ:ການຊ້ອມຮົບຄັ້ງນີ້ພົວພັນກັບສະພາບການພົວພັນລະຫວ່າງຈີນ-ອິນເດຍໃນປັດຈຸບັນນັ້ນຈຶ່ງບໍ່ສົມເຫດສົມຜົນ ແລະແມ່ນການກະທຳທີ່ຍຸແຍ່ເພື່ອສ້າງຄວາມແຕກແຍກກັນ. ຖ້າມີຄວາມຈຳເປັນ, ຣັດເຊຍຈະສະໜອງຂໍ້ມູນຂ່າວສານທີ່ກ່ຽວຂ້ອງເພື່ອຄວາມກະຈ່າງແຈ້ງ.

ກ່ອນໜ້ານີ້, ສື່ມວນຊົນອິນເດຍໄດ້ລາຍງານວ່າ: ການຊ້ອມຮົບຮ່ວມອິນດຣາ 2017  ລະຫວ່າງອິນເດຍແລະຣັດເຊຍປະກອບມີກອງທັບບົກ,ກອງທັບອາກາດແລະກອງທັບທະເລໃນເດືອນຕຸລາປີນີ້.