ຄະນະກຳມະການພັດທະນາແລະປະຕິຮູບແຫ່ງລັດຈີນເປີດເຜີຍໃນວັນທີ 17 ສິງຫານີ້ວ່າ, ມາຮອດປັດຈຸບັນ, ມີ 69 ປະເທດແລະອົງການຈັດຕັ້ງສາກົນໄດ້ເຊັນສັນຍາຮ່ວມມືກໍ່ສ້າງຕາມຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກັບຈີນແລ້ວ.
ເຈົ້າໜ້າທີ່ຄະນະກຳມະການພັດທະນາແລະປະຕິຮູບແຫ່ງລັດຈີນກ່າວວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ໄດ້ເລັ່ງລັດເຊື່ອມຕໍ່ກັບສະຫະພັນເສດຖະກິດເອີຣົບອາຊີຣັດເຊຍ, "ເສັ້ນທາງສະຫວ່າງ" ຂອງກາຊັກສະຖານ, ວິໄສທັດ 2030 ຂອງອາຣັບບີຊາອຸດິດ ແລະອື່ນໆ ຂະນະທີ່ "ໂຄງຮ່າງແຜນການສ້າງແລວທາງເສດຖະກິດຈີນ-ມົງໂກລີ-ຣັດເຊຍ" ກໍໄດ້ລົງມືເຮັດແລ້ວ. ນອກຈາກປະເທດອາຊີແລະເອີຣົບແລ້ວ, ປະເທດໃນອາຟຣິກາ, ອາເມລິກາລາຕິນ ແລະກາຣາອິບ ກໍໄດ້ເຫັນດີແລະເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ".
ເຈົ້າໜ້າທີ່ທ່ານດັ່ງກ່າວກ່າວຕື່ມວ່າ, ບາດກ້າວຕໍ່ໄປ, ຈະອອກແຮງຈັດຕັ້ງປະຕິບັດໝາກຜົນຕ່າງໆຂອງເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ", ສ້າງຕັ້ງສູນສົ່ງເສີມການສ້າງ "ໜຶ່ງແລວທາງໜຶ່ງເສັ້ນທາງ", ສູນຮ່ວມມືລະດົມທຶນແລະພັດທະນາຫຼາຍຝ່າຍ ແລະການຮ່ວມມືອື່ນໆ.