ຈາກການວາງສະແດງອຸປະກອນວັດທະນະທຳລະດັບສຸດຍອດ, ການຄ້າເຄື່ອງສິລະປະສາກົນທີ່ເຕັມໄປດ້ວຍພະລັງຊີວິດ, ເຖິງການພັດທະນາສິນຄ້າທີ່ຄົ້ນຄວ້າຜະລິດຈາກວັດຖຸບູຮານ, ໃນຊຸມປີມໍ່ໆມານີ້, ການຄ້າດ້ານວັດທະນະທຳຢູ່ເຂດການຄ້າເສລີຊຽງໄຮທີ່ເປັນເຂດການຄ້າເສລີແຫ່ງທຳອິດພາຍໃນປະເທດຈີນໄດ້ເພີ່ມຂຶ້ນຢ່າງວ່ອງໄວ, ກາຍເປັນເວທີສຳຄັນຂອງຈີນໃນຊຸກຍູ້ການແລກປ່ຽນວັດທະນະທຳຈີນກັບຕ່າງປະເທດ.
ໃນກອງປະຊຸມເວທີປຶກສາຫາລືຊັ້ນສູງ "ການສົນທະນາຢູ່ຊຽງໄຮ - ສິລະປະເປີດແນວຄິດອະນາຄົດ"ທີ່ຈັດຂຶ້ນໃນຫວ່າງກ່ອນນີ້ບໍ່ດົນ, ທ່ານລີຈ້າວເຈ, ຮອງຫົວໜ້າຄະນະກຳມະການຄຸ້ມຄອງເຂດການຄ້າເສລີຊຽງໄຮກ່າວວ່າ, ແຕ່ການເປີດນຳໃຊ້ເປັນເວລາ3ປີມານີ້, ເຂດການຄ້າເສລີຊຽງໄຮໄດ້ສະໜອງສະພາບແວດລ້ອມດ້ານລະບຽບການແລະໂອກາດການຕະຫຼາດທີ່ດີໃຫ້ແກ່ການພັດທະນາຂອງວິສາຫະກິດປະເພດວັດທະນະທຳ. ປັດຈຸບັນ, ມີວິສາຫະກິດປະມານ 500ແຫ່ງປະຈຳຢູ່ສູນການຄ້າວັດທະນະທຳຕໍ່ຕ່າງປະເທດຂອງຈີນທີ່ຢູ່ໃນເຂດການຄ້າເສລີຊຽງໄຮ, ໂດຍລວມທັງຂະແໜງການຕ່າງໆ, ເຊັ່ນ: ອຸປະກອນວັດທະນະທຳໄຮເທັກ, ເຄື່ອງສິລະປະວັດທະນະທຳ, ຈົນຮອດກາຕູນແລະເກມເອເລັກໂຕຼນິກ.
ທ່ານຫູຫວນຈົ່ງ ຮອງຜູ້ອຳນວຍການໃຫຍ່ສູນການຄ້າວັດທະນະທຳຕໍ່ຕ່າງປະເທດຂອງຈີນກ່າວວ່າ, ເຂດການຄ້າເສລີໄດ້ນຳໃຊ້ທ່າແຮງພິເສດໃນດ້ານການຕິດຕາມຄຸ້ມຄອງຂອງດ່ານພາສີ, ເຊື່ອມຕໍ່ຕະຫຼາດພາຍໃນກັບຕະຫຼາດສາກົນ, ຊຸກຍູ້ການສົ່ງອອກແລະນຳເຂົ້າຜະລິດຕະພັນວັດທະນະທຳທີ່ດີເດັ່ນ, ປັດຈຸບັນ ມູນຄ່າການຄ້າດ້ານວັດທະນະທຳທຸກປີໄດ້ຫຼາຍກວ່າ 30 ຕື້ຢວນແລ້ວ.