ກະຊວງກະສິກຳຟີລິບປີນຢືນຢັນໃນວັນທີ 18 ສິງຫານີ້ວ່າ, ພາຍຫຼັງແຂວງປຳປັນກາຢູ່ພາກເໜືອຂອງປະເທດຕົນເກີດການລະບາດພະຍາດໄຂ້ຫວັດສັດປີກເປັນເວລາໜຶ່ງອາທິດແລ້ວ, ກໍໄດ້ແຜ່ລາມໄປສູ່ແຂວງນິວວະໄອຊິຈາທີ່ຕິດກັບແຂວງດັ່ງກ່າວ. ປັດຈຸບັນລັດຖະບານໄດ້ສັ່ງຫ້າມບໍ່ໃຫ້ເກາະລູຊົນສົ່ງສັດປີກໄປບ່ອນອື່ນແລ້ວ.
ທ່ານເອມັນນູ ປິໂນນ ລັດຖະມົນຕີກະຊວງກະສິກຳຟີລິບປີນຢືນຢັນໃນວັນທີ 18 ສິງຫານີ້ວ່າ, ໄດ້ກວດພົບເຫັນພະຍາດໄຂ້ຫວັດສັດປີກຢູ່ຟາມລ້ຽງນົກກະທາແຫ່ງໜຶ່ງແລະຟາມລ້ຽງໄກ່ແຫ່ງໜຶ່ງຢູ່ແຂວງນິວວະໄອຊິຈາທີ່ຕັ້ງຢູ່ພາກກາງຂອງເກາະລູຊົນ. ລັດຖະບານປະເທດຕົນໄດ້ສະດຸ້ງໄວຕໍ່ສະພາບການດັ່ງກ່າວໂດຍໄດ້ສົ່ງເຈົ້າໜ້າທີ່ໜ່ວຍປ້ອງກັນພະຍາດໄປສອງແຫ່ງດັ່ງກ່າວເພື່ອຢືນຢັນວ່າເປັນເຊື້ອພະຍາດນີ້ແທ້ຫຼືບໍ່, ແລະກຳນົດເຂດຫ້າມໜຶ່ງກິໂລແມັດແລະເຂດຄວບຄຸມ 7 ກິໂລແມັດ.
ວັນທີ 11 ສິງຫານີ້, ນິຄົມກະເສດແຫ່ງໜຶ່ງຂອງແຂວງປຳປັນກະໄດ້ເກີດພະຍາດໄຂ້ຫວັດສັດປີກສາຍພັນ H5, ສົ່ງຜົນເຮັດໃຫ້ໄກ່ປະມານ 3,8 ໝື່ນໂຕຕາຍ. ຂະນະທີ່ທ່ານປິໂນນ ກ່າວວ່າ, ພະຍາດທີ່ແຜ່ລະບາດຢູ່ແຂວງດັ່ງກ່າວຄ້າຍຄືກັບພະຍາດທີ່ເກີດຂຶ້ນຢູ່ແຂວງນິວວະໄອຊິຈາ, ແຕ່ຍັງບໍ່ທັນໄດ້ຈະແຈ້ງເທື່ອໂດຍໃນປັດຈຸບັນໄດ້ສົ່ງແບບຢ່າງເຊື້ອພະຍາດໄປກວດກາຢູ່ອົສຕຼາລີແລ້ວ.