ພາຍຫຼັງການພົບປະລະຫວ່າງທ່ານ ລີສຽນລຸງ ນາຍົກລັດຖະມົນຕີສິງກະໂປ ແລະ ທ່ານ ບີນາລີ ຢິວດີຣິມ ນາຍົກລັດຖະມົນຕີຕວກກີໃນໂອກາດຢ້ຽມຢາມສິງກະໂປ,ທັງສອງນາຍົກກໍໄດ້ຖະແຫຼງຂ່າວຮ່ວມໃນວັນທີ 21 ສິງຫານີ້,ຂະນະທີ່ທ່ານນາຍົກລັດຖະມົນຕີສິງກະໂປໄດ້ປະກາດວ່າ: ລັດຖະບານປະເທດຕົນແລະສະພາແຫ່ງຊາດຕວກກີໄດ້ອະນຸມັດການປະຕິບັດສັນຍາການຄ້າເສລີສອງຝ່າຍທີ່ລົງນາມໃນປີ 2015 ແລະສັນຍາດັ່ງກ່າວຈະເລີ່ມ ບັງຄັບໃຊ້ໃນວັນທີ 1 ຕຸລາປີນີ້.
ທ່ານ ລີສຽນລຸງ ກ່າວວ່າ: ສັນຍາດັ່ງກ່າວແມ່ນຂີດໝາຍທາງປະຫວັດສາດທີ່ສຳຄັນຂອງການພົວພັນລະຫວ່າງສອງຝ່າຍ. ຂະນະທີ່ທ່ານ ຢິວດີຣິມ ກໍກ່າວວ່າ: ມູນຄ່າການຄ້າສອງຝ່າຍໃນ 10 ປີຜ່ານມາໄດ້ເພີ່ມຂຶ້ນ ແລະສັນຍາການຄ້າເສລີຈະຊຸກຍູ້ການຄ້າສອງຝ່າຍໃຫ້ຂະຫຍາຍຕົວຕື່ມອີກ.
ຂ່າວແຈ້ງວ່າ: ຫຼັງຈາກສັນຍາວ່າດ້ວຍການຄ້າເສລີສະບັບດັ່ງກ່າວເລີ່ມມີຜົນບັງຄັບໃຊ້ແລ້ວ, ສິນຄ້າທີ່ສິງກະໂປສົ່ງໄປຕວກກີໃນປັດຈຸບັນເຊິ່ງປະກອບມີຜະລິດຕະພັນເອເລັກໂຕຣນິກ, ຢາປິ່ນປົວ, ຢາເຄມີ ແລະອາຫານ 80% ຈະໄດ້ຮັບການຍົກເວັ້ນພາສີ ແລະຮອດປີ 2027 ຈະຍົກໃຫ້ສູງຂຶ້ນຮອດ 95%. ນອກນີ້, ສິງກະໂປຈະຍົກເວັ້ນພາສີຜະລິດຕະພັນນຳເຂົ້າ 100% ຂອງຕວກກີທັນທີ.
 |
