ຕອນຄ່ຳວັນທີ 20 ສິງຫານີ້ໃນໂອກາດກ່າວປາໄສໃນພິທີສະເຫຼີມສະຫຼອງວັນຊາດ, ທ່ານລີຊຽນລຸງ ນາຍົກລັດຖະມົນຕີສິງກະໂປກ່າວວ່າ, ການຊຳລະເງິນແບບເອເລັກໂຕຼນິກຂອງຈີນໄດ້ນຳໜ້າໂລກ, ເຊິ່ງປະເທດຕົນກໍພວມສຸມກຳລັງຊຸກຍູ້ການຊຳລະໃນຮູບແບບດັ່ງກ່າວ.
ທ່ານລີຊຽນລຸງ ກ່າວວ່າ, ປັດຈຸບັນຢູ່ຕົວເມືອງໃຫຍ່ຂອງຈີນ, ການໃຊ້ເງິນສົດແມ່ນເລື່ອງທີ່ຫຼ້າຫຼັງແລ້ວ, ແລະຍິ່ງກວ່ານັ້ນການໃຊ້ບັດເຄຣດິດກໍໜ້ອຍລົງ. ທັງນີ້ປະຊາຊົນລ້ວນແຕ່ຊຳລະທາງ wechat ຫຼື ອາລີເພ. ໂດຍຊອຟແວເຫຼົ່ານີ້ສາມາດຊຳລະໄດ້ເກືອບທຸກຢ່າງ. ແນວໃດກໍດີ, ທ່ານລີຊຽນລຸງກໍຊີ້ໃຫ້ເຫັນວ່າ, ສິງກະໂປກໍມີວິທີຈ່າຍເງິນແບບເອເລັກໂຕຼນິກເຊັ່ນດຽວກັນ, ແຕ່ວິທີເຫຼົ່ານີ້ມີຫຼາຍເກີນໄປ, ແລະລະບົບເຫຼົ່ານີ້ກໍບໍ່ເຊື່ອມໂຍງກັນ. ເຊິ່ງຫຼາຍຄົນຕ້ອງຖືຫຼາຍບັດ, ນັກທຸລະກິດກໍຕ້ອງຕິດຕັ້ງເຄື່ອງຊຳລະຂອງຫຼາຍບໍລິສັດ, ໂດຍບັນຫາເຫຼົ່ານີ້ບໍ່ພຽງແຕ່ເຮັດໃຫ້ຜູ້ບໍລິໂພກບໍ່ສະດວກ, ຍັງໄດ້ເພີ່ມຕົ້ນທຶນຂອງນັກທຸລະກິດຕື່ມອີກ.
ທ່ານລີຊຽນລຸງກ່າວຕື່ມວ່າ, ກົມຄວບຄຸມການເງິນປະເທດຕົນໄດ້ເລີ່ມລົງມືເພື່ອປ່ຽນແປງສະພາບປັດຈຸບັນ, ແລະຄິດວ່າໃນອີກບໍ່ດົນນີ້, ສິງກະໂປກໍສາມາດຊຳລະດ້ວຍ QR code ໄດ້, ເຊິ່ງມັນສາມາດສ້າງຄວາມສະດວກ ລາຄາຖືກແລະປອດໄພ, ທັງບໍ່ຕ້ອງເສຍເງິນອື່ມໃສ່ບັດເຄຣດິດອີກ.
 |
