ວັນທີ 22 ສິງຫານີ້ຢູ່ຫໍສະພາປະຊາຊົນແຫ່ງຊາດຈີນ, ທ່ານຈ່າງເຕີຈ່ຽງ ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ພົບປະກັບທ່ານວິຣັນໂຕ ລັດຖະມົນຕີກະຊວງການເມືອງ ກົດໝາຍແລະວຽກງານຄວາມປອດໄພອິນໂດເນເຊຍໃນໂອກາດເຂົ້າຮ່ວມກອງປະຊຸມກົນໄກສົນທະນາຂັ້ນຮອງນາຍົກລັດຖະມົນຕີຈີນ-ອິນໂດເນເຊຍຄັ້ງທີ 6 ແລະທ່ານດາມິນ ນາຊູຊັນ ລັດຖະມົນຕີກະຊວງວາງແຜນເສດຖະກິດອິນໂດເນເຊຍທີ່ເດີນທາງມາເຂົ້າຮ່ວມກອງປະຊຸມສົນທະນາເສດຖະກິດຂັ້ນສູງຈີນ-ອິນໂດເນເຊຍຄັ້ງທີ 3 ທີ່ຈັດຂຶ້ນຢູ່ ສປ ຈີນ.
ທ່ານຈ່າງເຕີຈ່ຽງກ່າວວ່າ, ປັດຈຸບັນ, ສາຍພົວພັນລະຫວ່າງຈີນແລະອິນໂດເນເຊຍມີທ່າອຽງຂະຫຍາຍຕົວເປັນຢ່າງດີ. ຂະນະທີ່ຫຼາຍປີຜ່ານມາ, ທ່ານສີຈິ້ນຜິງ ປະທານປະເທດຈີນແລະທ່ານໂຈໂກ ວິໂດໂດ ປະທານາທິບໍດີອິນໂດເນເຊຍກໍໄດ້ພົບປະກັນຫຼາຍເທື່ອແລະໄດ້ເປັນເອກະພາບໃນບັນຫາທີ່ສຳຄັນຕ່າງໆ, ທັງໄດ້ຊີ້ທິດໃຫ້ແກ່ການສົ່ງເສີມສາຍພົວພັນລະຫວ່າງສອງປະເທດໃຫ້ຂະຫຍາຍຕົວດ້ວຍຄວາມເປັນເອກະພາບຂອງປະມຸກລັດສອງປະເທດ, ຈີນພ້ອມຮ່ວມກັບອິນໂດເນເຊຍຈັດຕັ້ງປະຕິບັດໃຫ້ໄດ້ເປັນຢ່າງດີ, ໂດຍການເຮັດໃຫ້ການໄປມາຫາສູ່ກັນລະຫວ່າງການນຳຂັ້ນສູງໃກ້ຊິດກວ່າເກົ່າ, ເພີ່ມທະວີການເຊື່ອມໂຍງຍຸດທະສາດພັດທະນາ, ລົງເລິກການຮ່ວມມືຢ່າງແທ້ຈິງໃນຂົງເຂດຕ່າງໆ, ປັບປຸງພື້ນຖານມິດຕະພາບທາງສັງຄົມໃຫ້ສົມບູນ, ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ຂະຫຍາຍຕົວຢ່າງຕໍ່ເນື່ອງ. ພ້ອມນີ້, ສະພາປະຊາຊົນແຫ່ງຊາດຈີນກໍຍິນດີເພີ່ມທະວີການແລກປ່ຽນແລະການຮ່ວມມືກັບອົງການນິຕິບັນຍັດຂອງອິນໂດເນເຊຍ, ດ້ວຍການສ້າງສະພາບແວດລ້ອມການຮ່ວມມືດ້ານກົດໝາຍແລະລະບຽບ, ການລວມທັງປັບປຸງແລະສົ່ງເສີມຄວາມເຂົ້າໃຈລະຫວ່າງສອງປະເທດໃຫ້ດີຂຶ້ນຢ່າງບໍ່ຢຸດຢັ້ງ.
ທ່ານວິຣັນໂຕແລະທ່ານດາມິນກ່າວວ່າ, ອິນໂດເນເຊຍເອົາໃຈໃສ່ໃນສູງຕໍ່ສາຍພົວພັນກັບຈີນ, ຖືສຳຄັນຕໍ່ອິດທິພົນສຳຄັນຂອງຈີນຕໍ່ວຽກງານສາກົນແລະພາກພື້ນ, ທັງຍິນດີຮ່ວມກັບຈີນສືບຕໍ່ລົງເລິກການຮ່ວມມືໃນຂົງເຂດຄວາມໝັ້ນຄົງດ້ານການເມືອງແລະເສດຖະກິດ, ຊຸກຍູ້ສາຍພົວພັນລະຫວ່າງສອງປະເທດໃຫ້ກ້າວໜ້າຂະຫຍາຍຕົວຢ່າງບໍ່ຢຸດຢັ້ງ.