ກອງປະຊຸມສົນທະນາເສດຖະກິດຂັ້ນສູງຈີນ-ອິນໂດເນເຊຍຄັ້ງທີ 3 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 22 ສິງຫານີ້ ໂດຍທ່ານຢ໋າງເຈສື ທີ່ປຶກສາແຫ່ງລັດຈີນ ແລະທ່ານດາມິນ ນາຊູຊັນ ລັດຖະມົນຕີກະຊວງວາງແຜນເສດຖະກິດອິນໂດເນເຊຍເປັນປະທານຮ່ວມ ເຊິ່ງກອງປະຊຸມດັ່ງກ່າວເນັ້ນຜັນຂະຫຍາຍຄວາມເປັນເອກະພາບຂອງປະມຸກລັດສອງປະເທດ ທັງລົງເລິກສາຍພົວພັນຄູ່ຍຸດທະສາດຮອບດ້ານລະຫວ່າງສອງປະເທດ, ລົງເລິກຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ" ແລະຊຸກຍູ້ການຮ່ວມມືເສດຖະກິດໃນທຸກຂົງເຂດໃຫ້ຂະຫຍາຍຕົວ.
ທ່ານຢ໋າງເຈສືກ່າວວ່າ, ຈີນແລະອິນໂດເນເຊຍມີມິດຕະພາບທີ່ເປັນມູນເຊື້ອມາແຕ່ດົນນານ ເຊິ່ງສອງຝ່າຍຄວນຮ່ວມມືກັນຢ່າງແໜ້ນແຟ້ນ ຊຸກຍູ້ການຄ້າໃຫ້ຂະຫຍາຍຕົວຢ່າງແຂງແຮງແລະຕໍ່ເນື່ອງ, ເປີດກວ້າງການລົງທຶນເຊິ່ງກັນແລະກັນຕື່ມອີກ, ເປີດກວ້າງການຮ່ວມມືຢ່າງຮອບດ້ານ ທັງໃນຂົງເຂດກໍ່ສ້າງພື້ນຖານໂຄງລ່າງ, ກະສິກຳ, ທະນາຄານ, ພະລັງງານແລະອື່ນໆ, ສະໜັບສະໜູນການສ້າງ "ແລວທາງເສດຖະກິດພາກຕາເວັນອອກສຽງເໜືອ, ພາກເໜືອແລະພາກຕາເວັນຕົກສຽງເໜືອຂອງອິນໂດເນເຊຍ", ຄົ້ນຄວ້າໂອກາດຮ່ວມມືໃນຂະແໜງການຈະເລີນໃໝ່ ເຊັ່ນ: ທຸລະກິດເອເລັກໂຕຣນິກ ເປັນຕົ້ນ ເພື່ອຊຸກຍູ້ການຮ່ວມມືເສດຖະກິດການຄ້າໃຫ້ກ້າວຂຶ້ນສູ່ລະດັບໃໝ່.
ທ່ານດາມິນກ່າວວ່າ, ອິນໂດເນເຊຍຍິນດີຮ່ວມກັບຈີນ ລົງເລິກຂຸດຄົ້ນຄວາມອາດສາມາດບົ່ມຊ້ອນດ້ານການຮ່ວມມືໃນຂົງເຂດເຊື່ອມຈອດກັນ, ການຄ້າແລະການລົງທຶນ, ທະນາຄານ, ພະລັງງານ, ທຸລະກິດເອເລັກໂຕຣນິກ ແລະອື່ນໆ ເພື່ອຊຸກຍູ້ການພົວພັນເສດຖະກິດການຄ້າລະຫວ່າງສອງປະເທດໃຫ້ສູງກວ່າເກົ່າແລະກວ້າງກວ່າເກົ່າ.