ວັນທີ 22 ສິງຫານີ້, ລັດຖະບານໄທໄດ້ອະນຸມັດສັນຍາອອກແບບໂຄງການຮ່ວມມືທາງລົດໄຟໄທ-ຈີນໄລຍະ 1 ຄືຕອນແຕ່ນະຄອນຫຼວງບາງກອກຫານະຄອນຣາຊະສີມາ ເພື່ອສ້າງເງື່ອນໄຂໃຫ້ສອງຝ່າຍລົງນາມໂດຍໄວ.
ທ່ານ ກອບສັກ ພູຕະກຸນ ຮອງລັດຖະມົນຕີປະຈຳສຳນັກນາຍົກລັດຖະມົນຕີ ໄດ້ກ່າວໃນງານຖະແຫຼງຂ່າວຫຼັງກອງປະຊຸມຄະນະລັດຖະບານສັນຈອນຢູ່ນະຄອນຣາຊະສີມາວ່າ, ຄ່າອອກແບບໂຄງການໄລຍະ 1 ມີມູນຄ່າປະມານ 1 ຕື້ 700 ລ້ານບາດນັ້ນ, ລັດຖະບານຈະຈ້າງວິສາຫະກິດຈີນອອກແບບຕອນເປັນຂົວ, ຕອນຕາມພື້ນດິນ, ອຸໂມງ ແລະສິ່ງກໍ່ສ້າງຕ່າງໆຂອງໂຄງການດັ່າງກ່າວ ພ້ອມທັງເຮັດສັນຍາຕິດຕາມກວດກາ ແລະສັນຍາອື່ນໆທີ່ກ່ຽວຂ້ອງກັບລາງລົດໄຟ, ພະລັງງານໄຟຟ້າ, ຕູ້ລົດໄຟ ແລະການຍົກລະດັບຊັບພະຍາກອນມະນຸດເປັນຕົ້ນ ແລະຈະສ້າງຕັ້ງອົງການສະເພາະເພື່ອເລັ່ງຊຸກຍູ້ການປະຕິບັດໂຄງການຕາມແຜນການ.
ນອກນີ້, ສະຖານທູດຈີນປະຈຳໄທ ໄດ້ອອກແຈ້ງການກ່ອນໜ້ານີ້ບໍ່ດົນວ່າ, ຈີນແລະໄທໄດ້ສຳເລັດການເຈລະຈາສັນຍາອອກແບບໂຄງການຮ່ວມມືທາງລົດໄຟຈີນ-ໄທໄລຍະ 1 ແລ້ວ ແລະປັດຈຸບັນ, ພວມຂຸ້ນຂ້ຽວເຮັດວຽກກະກຽມເຊັນສັນຍາໃນຕົ້ນເດືອນກັນຍາ ແລະຄາດວ່າຈະລົງມືປະຕິບັດໂຄງການໃນເດືອນຕຸລາປີນີ້.
 |
