ກອງປະຊຸມເວທີປຶກສາຫາລືການຮ່ວມມືຊັບພະຍາກອນບໍ່ແຮ່ຈີນ-ອາຊຽນຄັ້ງທີ 8 ປີ 2017 ໄດ້ຈັດຂຶ້ນຢູ່ເມືອງນານນິງເຂດປົກຄອງຕົນເອງເຜົ່າຈວ້າງກວາງຊີຈີນໃນວັນທີ 24 ສິງຫານີ້ ໂດຍບຸກຄົນວົງການການເມືອງແລະການຄ້າຈາກຈີນແລະປະເທດໃນອາຊຽນເຊັ່ນ: ລາວ,ຫວຽດນາມ,ອິນໂດເນເຊຍ,ຟີລິບປິນ,ໄທແລະອື່ນໆປະມານ 800 ທ່ານເຂົ້າຮ່ວມ. ແລະມີຫົວຂໍ້ "ສ້າງສູນຂໍ້ມູນຂ່າວສານຂະແໜງການບໍ່ແຮ່ຈີນ-ອາຊຽນ,ລົງເລິກການສ້າງເວທີໃໝ່ແຫ່ງການຮ່ວມມືຂອງໜຶ່ງແລວທາງໜຶ່ງເສັ້ນທາງ". ຜູ້ຊີ້ນຳຂະແໜງການຊັບພະຍາກອນບໍ່ແຮ່ຂອງຈີນແລະຫຼາຍປະເທດໃນອາຊຽນໄດ້ຫາລືຫົວຂໍ້ຕ່າງໆເປັນຕົ້ນ: ເລັ່ງພັດທະນາເສດຖະກິດຂະແໜງການບໍ່ແຮ່ຂອງພາກພື້ນ, ຮ່ວມກັນສ້າງການຮ່ວມມືຂະແໜງການບໍ່ແຮ່ແບບສີຂຽວແລະຍືນຍົງແລະອື່ນໆ.
ທ່ານ ສາວເວີ້ຍຊິ່ງ ຮອງລັດຖະມົນຕີກະຊວງຊັບພະຍາກອນທີ່ດິນແຫ່ງຊາດຈີນກ່າວວ່າ: ປັດຈຸບັນ, ຈີນແລະອາຊຽນຕ່າງກໍໄດ້ອອກແຮງຊຸກຍູ້ການຫັນເປັນອຸດສາຫະກຳແລະຕົວເມືອງ ເຊິ່ງຄຽງຄູ່ກັບການຍົກລະດັບເຂດການຄ້າເສລີຈີນ-ອາຊຽນແລ້ວ,ການຮ່ວມມືໃນຂະແໜງການບໍ່ແຮ່ລະຫວ່າງສອງຝ່າຍຈະພົບກັບຕະຫຼາດທີ່ກວ້າງຂວາງກວ່າເກົ່າ,ເງື່ອນໄຂການຄ້າທີ່ສະດວກກວ່າເກົ່າແລະສະພາບແວດລ້ອມທີ່ມີຄຸນນະພາບສູງກວ່າເກົ່າ. ຈາກນີ້,ຈີນແລະອາຊຽນຄວນກຳໂອກາດ,ສະແຫວງຫາການພັດທະນາແບບຍືນຍົງ,ລົງເລິກຊຸກຍູ້ການຮ່ວມມືລະຫວ່າງສອງຝ່າຍໃນຂົງເຂດຂະແໜງການບໍ່ແຮ່ຢ່າງແທ້ຈິງແລະຮອບດ້ານ.