ເຈົ້າໜ້າທີ່ກະຊວງການຕ່າງປະເທດມາເລເຊຍຖະແຫຼງໃນວັນທີ 24 ສິງຫານີ້ວ່າ, ໂດຍຕອບສະໜອງຕາມຄຳເຊີນຂອງທ່ານໂດນັນ ທຣຳ ປະທານາທິບໍດີອາເມລິກາ, ທ່ານນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍຈະເດີນທາງຢ້ຽມຢາມອາເມລິກາໃນວັນທີ 12 ກັນຍາທີ່ຈະມາເຖິງນີ້ ແລະພົບປະກັບທ່ານໂດນັນ ທຣຳ.
ປີ 2017 ເປັນປີຄົບຮອບ 60 ປີແຫ່ງການສ້າງສາຍພົວພັນທາງການທູດລະຫວ່າງມາເລເຊຍແລະອາເມລິກາ, ທັງສອງປະເທດຫວັງຈະໄດ້ຮ່ວມກັນສະເຫຼີມສະຫຼອງວັນສຳຄັນດັ່ງກ່າວ, ທັງນີ້ສາຍພົວພັນລະຫວ່າງສອງປະເທດມີຄວາມແໜ້ນແຟ້ນ ພາຍໃຕ້ການນຳພາຂອງທ່ານນາຈິບ ແລະປັດຈຸບັນ ອາເມລິກາແລະມາເລເຊຍໄດ້ສ້າງສາຍພົວພັນຄູ່ຮອບດ້ານ. ໃນໂອກາດຢ້ຽມຢາມອາເມລິກາ, ປະມຸກລັດສອງປະເທດຈະເຈລະຈາກ່ຽວກັບຄວາມໝັ້ນຄົງແຫ່ງຊາດ, ການປາບປາມລັດທິກໍ່ການຮ້າຍແລະລັດທິຫົວຮຸນແຮງໃນທົ່ວໂລກ, ການຄ້າແລະການລົງທຶນ ແລະອື່ນໆ.
ຂ່າວແຈ້ງວ່າ, ທຳນຽບຂາວອາເມລິກາກໍໄດ້ຖະແຫຼງຂ່າວກ່ຽວກັບການມາຢ້ຽມຢາມຂອງນາຍົກລັດຖະມົນຕີມາເລເຊຍ ແລະຖືມາເລເຊຍເປັນ "ໜຶ່ງໃນຄູ່ຮ່ວມມືທີ່ແໜ້ນແຟ້ນທີ່ສຸດຂອງອາເມລິກາຢູ່ອາຊີຕາເວັນອອກສຽງໃຕ້".