ວັນທີ 25 ສິງຫານີ້, ກຳປັ່ນປະຕິບັດກົດໝາຍຈີນ 3 ລຳໄດ້ເຂົ້າທຽບທ່າເຮືອກ່ວນເຫຼີຍຈີນ ເຊິ່ງເປັນຂີດໝາຍສະແດງໃຫ້ເຫັນວ່າ ການປະຕິບັດໜ້າທີ່ລາດຕະເວນຮ່ວມຕາມລຳແມ່ນ້ຳຂອງເທື່ອທີ 61 ລະຫວ່າງຈີນ,ລາວ,ມຽນມາແລະໄທໄດ້ປະສົບຜົນສຳເລັດຢ່າງຈົບງາມ.
ໃນໄລຍະ ປະຕິບັດໜ້າທີ່, ເຈົ້າໜ້າທີ່ບັນຊາການສີ່ປະເທດດັ່ງກ່າວໄດ້ລົງເລິກແລກປ່ຽນຄວາມເຫັນກ່ຽວກັບການສືບຕໍ່ຮ່ວມກັນປາບປາມອາຊະຍາກຳຂ້າມຊາດຕາມລຳແມ່ນ້ຳຂອງໃນໄລຍະນີ້, ຮ່ວມກັນຄົ້ນຄວ້າແລະສ້າງແຜນດຳເນີນງານໃນບາດກ້າວຕໍ່ໄປ, ປະສານສົມທົບຢ່າງໃກ້ຊິດແລະຮ່ວມມືແບບຄຽງບ່າຄຽງໄຫຼ່, ເພີ່ມທະວີການໂຄສະນາແລະຄວາມເຂັ້ມງວດໃນການປະຕິບັດກົດໝາຍ, ເພີ່ມກຳລັງຕຳຫຼວດປະຈຳການຢູ່ຕາມລຳແມ່ນ້ຳຂອງທີ່ມີຄວາມສັບສົນອ່ອນໄຫວຕື່ມອີກເພື່ອປ້ອງກັນການເດີນເຮືອແລະການພັດທະນາເສດຖະກິດໃຫ້ຈະເລີນເຕີບໂຕຂອງທາງນ້ຳຄຳດັ່ງກ່າວ.
ຂ່າວແຈ້ງວ່າ: ໃນໄລຍະປະຕິບັດໜ້າທີ່ຄັ້ງນີ້, ໜ່ວຍກຳປັ່ນລາດຕະເວນໄດ້ດຳເນີນການລາດຕະເວນຮ່ວມຕາມເຂດນ້ຳສຳຄັນທີ່ມີຄວາມອ່ອນໄຫວເຊັ່ນສາມລ່ຽມຄຳ, ບ້ານຊຽງກົກ ແລະອື່ນໆ ເຊິ່ງໄດ້ເດີນເຮືອໃນໄລຍະທາງ 604 ກິໂລແມັດແລະໃຊ້ເວລາ 34 ຊົ່ວໂມງ.