ລັດຖະບານແລະກອງທັບປ້ອງກັນຊາດມຽນມາໄດ້ເປີດເຜີຍສະພາບຫຼ້າສຸດຂອງເຫດການຫຼອນໂຈມຕີແບບກໍ່ການຮ້າຍທີ່ເກີດຂຶ້ນຢູ່ລັດຍະໄຂ່ໃນຕອນບ່າຍວັນທີ 25 ສິງຫານີ້ວ່າ: ເຫດການຫຼອນໂຈມຕີພ້ອມການຍິງປະທະກັນລະຫວ່າງທະຫານຕຳຫຼວດກັບຜູ້ກໍ່ການຮ້າຍທີ່ເກີດຂຶ້ນຕໍ່ມາໄດ້ເຮັດໃຫ້ມີຜູ້ເສຍຊີວິດ 71 ຄົນ.
ກະຊວງສຳນັກທີ່ປຶກສາແຫ່ງລັດມຽນມາໄດ້ປະກາດໃນວັນທີ 25 ສິງຫານີ້ວ່າ: ຕອນຮຸ່ງເຊົ້າວັນດັ່ງກ່າວ, ສະຖານີຕຳຫຼວດ,ປ້ອມຍາມຫຼາຍແຫ່ງຂອງເມືອງມອງດໍແລະແຫ່ງອື່ນໆຂອງລັດຍະໄຂ່ຖືກກຸ່ມກໍ່ການຮ້າຍຫຼອນໂຈມຕີ.ໃນນີ້, ຢູ່ເມືອງມອງດໍແລະເມືອງອື່ນໆມີປ້ອມຕຳຫຼວດ 30 ແຫ່ງຖືກຫຼອນໂຈມຕີ ສົ່ງຜົນເຮັດໃຫ້ ຕຳຫຼວດ 10 ຄົນ, ທະຫານ 1 ຄົນແລະພະນັກງານກົມກວດກາຄົນເຂົ້າເມືອງ 1 ຄົນເສຍຊີວິດ, ນອກນີ້, ມີທະຫານຕຳຫຼວດອີກ 11 ຄົນໄດ້ຮັບບາດເຈັບ, ໃນນີ້ 3 ຄົນບາດເຈັບສາຫັດ ຂະນະທີ່ຜູ້ກໍ່ການຮ້າຍ 59 ຄົນຖືກຍິງສັງຫານ, 1 ຄົນຖືກຈັບຕົວ.
ກອງບັນຊາການກອງທັບປ້ອງກັນຊາດມຽນມາປະກາດໃນທີ 25 ສິງຫານີ້ວ່າ ມາຮອດເວລາ 12 ໂມງຂອງວັນດັ່ງກ່າວ, ກອງທັບປ້ອງກັນຊາດແລະເຈົ້າໜ້າທີ່ຕຳຫຼວດຍັງສືບຕໍ່ຍິງຕໍ່ສູ້ກັບກຸ່ມກໍ່ການຮ້າຍຢູ່ລັດຍະໄຂ່.
ລັດຍະໄຂ່ຕັ້ງຢູ່ພາກຕາເວັນຕົກຂອງມຽນມາ, ປະຊາຊົນສ່ວນໃຫຍ່ເປັນຊາວເຜົ່າຍະໄຂ່ທີ່ເຊື່ອຖືສາສະໜາພຸດ ແລະຍັງມີຊາວໂຣຮິງຢາ ທີ່ເຊື່ອຖືສາສະໜາອິສລາມເປັນຈຳນວນຫຼາຍ, ສອງເຜົ່າດັ່ງກ່າວມີຄວາມຂັດແຍ້ງກັນມາແຕ່ດົນແລ້ວ.
 |
