ຕອນບ່າຍວັນທີ 26 ສິງຫານີ້ ທ່ານໂທມັສ ບາຮ ປະທານຄະນະກຳມະການໂອລິມປິກສາກົນໄດ້ໄປທັດສະນະສຶກສາຢູ່ສູນກິລາ ອູເຄີສົ່ງແລະບ່ອນອື່ນໆໃນນະຄອນຫຼວງປັກກິ່ງ. ທ່ານໄດ້ຕີລາຄາສູງຕໍ່ວຽກງານກະກຽມງານກິລາໂອລິມປິກລະດູໜາວປັກກິ່ງ ໂດຍໄດ້ສະແດງໃຫ້ເຫັນເຖິງການຈັດງານໂອລິມປິກແບບເປັນມິດກັບທຳມະຊາດ, ແລະທ່ານຍັງໄດ້ຍ້ອງຍໍງານກິລາແຫ່ງຊາດຈີນຄັ້ງທີ 13 ທີ່ຈະໄຂຂຶ້ນໃນໄວໆນີ້ທີ່ຍຶດຖືທັດສະນະ ໃຫ້ທົ່ວປວງຊົນມີສ່ວນຮ່ວມກັບການກິລາ.
ທ່ານກ່າວວ່າ, ວຽກງານກະກຽມງານກິລາໂອລິມປິກລະດູໜາວ ແລະງານກິລາໂອລິມປິກຄົນພິການລະດູໜາວປັກກິ່ງດີເດັ່ນທີ່ສຸດ, ຄະນະກຳມະການໂອລິມປິກລະດູໜາວປັກກິ່ງກັບຄະນະກຳມະການໂອລິມປິກສາກົນໄດ້ຮ່ວມມືກັນຢ່າງໃກ້ຊິດແລະເອົາໃຈໃສ່ເປັນຢ່າງດີ. ທ່ານຍັງໄດ້ຍ້ອງຍໍຈີນທີ່ນຳໃຊ້ໂອກາດຈັດງານໂອລິມປິກລະດູໜາວເພື່ອເຜີຍແຜ່ກິລາລະດູໜາວ, ແລະຄວາມພະຍາມຂອງນະຄອນຫຼວງປັກກິ່ງໃນການຜັນຂະຫຍາຍແນວຄິດທີ່ພັດທະນາແບບຍືນຍົງ.
ນອກນີ້ ທ່ານຍັງໄດ້ຊົມເຊີຍຕໍ່ທັດສະນະທີ່ໃຫ້ທົ່ວປວງຊົນມີສ່ວນຮ່ວມດ້ານກິລາຂອງງານກິລາແຫ່ງຊາດຈີນຄັ້ງທີ 13 ທີ່ຈະໄຂຂຶ້ນຢູ່ນະຄອນທຽນສິງໃນໄວໆນີ້ ໂດຍເຫັນວ່າການລະດົມໃຫ້ທົ່ວປວງຊົນເຂົ້າຮ່ວມ ແມ່ນໄດ້ສະແດງໃຫ້ເຫັນເຖິງຄວາມປະດິດສ້າງໃໝ່ ແລະຄວາມໂອບອ້ອມອາລີ. ທ່ານກ່າວວ່າ, ໃນຍຸກປັດຈຸບັນ, ບໍ່ຄວນລໍຖ້າຄົນທັງຫຼາຍໄປເຂົ້າຮ່ວມການກິລາ, ຄວນແມ່ນນຳເອົາການກິລາໄປສູ່ຄົນທັງຫຼາຍ, ພ້ອມທັງເປີດປະຕູແຫ່ງການກິລາໃຫ້ໝົດທຸກຄົນ.
