ວັນທີ 25 ສິງຫານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນເປັນປະທານກອງປະຊຸມສຳມະນາວ່າດ້ວຍການຊຸກຍູ້ການພັດທະນາຂະແໜງການຜະລິດເພື່ອສ້າງປະເທດໃຫ້ເຂັ້ມແຂງແລະສືບຕໍ່ຊຸກຍູ້ການຫັນປ່ຽນໂຄງປະກອບເສດຖະກິດໃຫ້ສູງຂຶ້ນ ເພື່ອຄົ້ນຄວ້າແລະກຳນົດວຽກງານ ນີ້.
ທ່ານຫຼີເຄີ້ສຽງກ່າວວ່າ: ຂະແໜງການຜະລິດເປັນພື້ນຖານການພັດທະນາເສດຖະກິດ. ຖ້າຢາກໃຫ້ເສດຖະກິດຈີນຫັນປ່ຽນແລະຍົກລະດັບໂຄງປະກອບເພື່ອບັນລຸການຫັນເປັນອຸດສາຫະກຳແບບໃໝ່ກໍ ຕ້ອງອາໄສການສ້າງຂະແໜງການຜະລິດໃຫ້ເຂັ້ມແຂງ. ໂດຍລວມແລ້ວ, ຂະແໜງການຜະລິດຂອງຈີນໃນປັດຈຸບັນມີບັນຫາພົ້ນເດັ່ນທີ່ສາກົນແບ່ງຄວາມຮັບຜິດຊອບໃຫ້ຍັງຢູ່ໃນລະດັບກາງແລະຕ່ຳເຖິງວ່າມີຂະໜາດໃຫຍ່ແຕ່ບໍ່ເຂັ້ມແຂງແລະອື່ນໆ. ນອກນີ້, ການຊຸກຍູ້ຂະແໜງການຜະລິດໃຫ້ມີລະດັບແລະຄຸນນະພາບສູງຂຶ້ນກໍເປັນເນື້ອໃນສຳຄັນໃນການຊຸກຍູ້ການປະຕິຮູບໂຄງປະກອບພາກການສະໜອງ. ຈາກນີ້, ຕ້ອງຕັ້ງໜ້າຈັດຕັ້ງປະຕິບັດແຜນຍຸດທະສາດຂອງສູນກາງພັກເພື່ອເລັ່ງກໍ່ສ້າງຂະແໜງການຜະລິດເພື່ອສ້າງປະເທດໃຫ້ເຂັ້ມແຂງ, ຜັນຂະຫຍາຍແນວຄິດພັດທະນາໃໝ່, ປະຕິບັດຍຸດທະສາດຊຸກຍູ້ການພັດທະນາດ້ວຍການປະດິດສ້າງໃໝ່, ອີງໃສ່ໂຄງການຂະແໜງການຜະລິດຈີນ2025ເພື່ອຊຸກຍູ້ຂະແໜງການຜະລິດໃຫ້ໄດ້ຮັບການຍົກລະດັບແລະມີຄຸນນະພາບສູງຂຶ້ນ, ຢຸດໃຊ້ເຕັກນິກການຜະລິດທີ່ຫຼ້າຫຼັງຢ່າງເດັດຂາດ, ເລັ່ງຫັນກຳລັງຊຸກຍູ້ແບບເກົ່າໃຫ້ເປັນແບບໃໝ່ເພື່ອສົ່ງເສີມເສດຖະກິດຈີນກ້າວຂຶ້ນສູ່ລະດັບກາງແລະສູງ.
ທ່ານຫຼີເຄີ້ສຽງຊີ້ໃຫ້ເຫັນວ່າ: ການສົ່ງເສີມຂະແໜງການຜະລິດໃຫ້ໄດ້ຮັບການຍົກລະດັບແລະມີຄຸນນະພາບສູງຂຶ້ນນັ້ນຕ້ອງອີງໃສ່ການພັດທະນາດ້ວຍການປະດິດສ້າງ,ຄວນນຳໃຊ້ຊັບພະຍາກອນມະນຸດທີ່ມີຢ່າງຫຼວງຫຼາຍໃຫ້ເຕັມສ່ວນເຊິ່ງເປັນທ່າແຮງບົ່ມຊ້ອນທີ່ໃຫຍ່ທີ່ສຸດຂອງປະເທດຕົນ, ຄວນສຸມໃສ່ສ້າງສະພາບແວດລ້ອມທີ່ເປັນຜົນດີຕໍ່ການຍົກລະດັບແລະຄຸນນະພາບຂອງຂະແໜງການຜະລິດໃຫ້ສູງຂຶ້ນ.