ທະນາຄານພັດທະນາອາຊີຫຼືADBຖະແຫຼງໃນວັນທີ 28 ສິງຫານີ້ວ່າ: ຄະນະອຳນວຍການໄດ້ອະນຸມັດເງິນກູ້ 180 ລ້ານໂດລາສະຫະລັດໃຫ້ຈີນເພື່ອສ້າງລະບົບຄົມມະນາຄົມທາງລົດໄຟທີ່ມີຄວາມປອດໄພ, ໜ້າເຊື່ອຖືກ ແລະມີປະສິດທິພາບສູງກວ່າເກົ່າຢູ່ເຂດພູດອຍພາກຕາເວັນຕົກສຽງໃຕ້ຂອງປະເທດດັ່ງກ່າວ.
ໂຄງການດັ່ງກ່າວຈະເນັ້ນຕິດຕັ້ງແລະນຳໃຊ້ອຸປະກອນເຕັກນິກໃໝ່ ເຊິ່ງປະກອບມີລະບົບທີ່ກ້າວໜ້າທັນສະໄໝຕ່າງໆຄືສັນຍານທາງລົດໄຟ,ລະບົບສື່ສານ,ກົນໄກສະໜອງໄຟຟ້າພ້ອມດ້ວຍລະບົບຕິດຕາມຄວາມປອດໄພໃນການແລ່ນຜ່ານອຸໂມງ. ຄາດວ່າໂຄງການນີ້ຈະກໍ່ສ້າງສຳເລັດໃນກາງປີ 2024 ໂດຍມີມູນຄ່າການລົງທຶນ 860 ລ້ານໂດລາສະຫະລັດ.
ທ່ານຊາຣັດ ຊາເຊນາ ຊ່ຽວຊານຄົມມະນາຄົມຂົນສົ່ງຂອງADBຊີ້ໃຫ້ເຫັນວ່າ: ລະບົບທາງລົດໄຟທີ່ປອດໄພແລະກ້າວໜ້າກວ່າເກົ່າຈະເຮັດໃຫ້ປະຊາຊົນມີທາງເລືອກໃນການສັນຈອນທີ່ຄຸນນະພາບດີແລະສະດວກວ່ອງໄວກວ່າເກົ່າ ທັງຄ້ຳຊູໃຫ້ແກ່ການຂະຫຍາຍຕົວຂອງເສດຖະກິດທ້ອງຖິ່ນອີກດ້ວຍ. ພ້ອມກັນນັ້ນ, ຍັງສາມາດສ້າງວຽກເຮັດງານທຳໄດ້ຫຼາຍກວ່າເກົ່າ, ຍົກສູງຄຸນນະພາບຊີວິດການເປັນຢູ່ຂອງປະຊາຊົນແລະສົ່ງເສີມບົດບາດຍິງ-ຊາຍ. ພວກຂ້າພະເຈົ້າຫວັງຈະຮ່ວມມືກັບຂະແໜງການກ່ຽວຂ້ອງຢ່າງໃກ້ຊິດເພື່ອຮ່ວມກັນບັນລຸເປົ້າໝາຍດັ່ງກ່າວນີ້.