ກອງປະຊຸມເວທີປຶກສາຫາລືການລະດົມທຶນເພື່ອການພັດທະນາແບບຍືນຍົງຂອງອາຊຽນ ເຊິ່ງສຳນັກເລຂາອາຊຽນ, ທູດຈີນປະຈຳອາຊຽນ ແລະ ອົງການສະຫະປະຊາຊາດເພື່ອການພັດທະນາ ຫຼື UNDP ເປັນເຈົ້າພາບຮ່ວມນັ້ນ ໄດ້ຈັດຂຶ້ນຢູ່ແຂວງຊຽງຣາຍປະເທດໄທເມື່ອບໍ່ດົນມານີ້ ໂດຍນັກວິຊາການຈີນ, ປະເທດໃນອາຊຽນ ແລະ ອົງການສະຫະປະຊາຊາດ ຈະຮ່ວມກັນວາງແຜນລະດົມທຶນເພື່ອການພັດທະນາແບບຍືນຍົງຂອງອາຊຽນ.
ທ່ານວົງເທບ ອັດທະຄາຍວັນວະທີ ຮອງເລຂາທິການອາຊຽນ ກ່າວວ່າ: ອາຊຽນ ແລະ ຈີນສຸມໃສ່ເພີ່ມທະວີການຮ່ວມມືໃນຂົງເຂດການພາດທະນາແບບຍືນຍົງຢ່າງສະເໝີຕົ້ນສະເໝີປາຍ. ແນວໃດກໍດີ, ຈີນໄດ້ຮັບໝາກຜົນອັນພົ້ນເດັ່ນໃນການຫຼຸດຜ່ອນຄວາມທຸກຍາກ ແລະ ໝາກຜົນເຫຼົ່ານີ້ ສ່ວນຫຼາຍກໍຖືກປະເທດໃນອາຊຽນກຳນົດເຂົ້າໃນຍຸດທະສາດການຫຼຸດຜ່ອນຄວາມທຸກຍາກຂອງຕົນແລ້ວ. ຈາກນີ້ຈຶ່ງຫວັງວ່າອາຊຽນແລະຈີນຈະແລກປ່ຽນບົດຮຽນຫຼຸດຜ່ອນຄວາມທຸກຍາກຢ່າງຕໍ່ເນື່ອງ.
"ຮ່າງບົດລາຍງານການລະດົມທຶນເພື່ອການພັດທະນາແບບຍືນຍົງຂອງອາຊຽນ" ທີ່ນຳມາຫາລືກັນໃນກອງປະຊຸມດັ່ງກ່າວ ໄດ້ລະບຸວ່າ: ການຮ່ວມມືລະຫວ່າງໃຕ້ໃຕ້ໃນພາກພື້ນນີ້ ໄດ້ພັດທະນາຢ່າງວ່ອງໄວ ໂດຍສະເພາະການສະໜັບສະໜູນດ້ານການເງິນຈາກຈີນ ໄດ້ສ້າງໂອກາດສຳຄັນໃຫ້ແກ່ການລະດົມທຶນໃນຂົງເຂດການກໍ່ສ້າງພື້ນຖານໂຄງລ່າງ ແລະ ເຮັດໃຫ້ທຶນທີ່ບໍ່ພໍນັ້ນຫຼຸດໜ້ອຍລົງ. ຂະນະທີ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະ ມາຕະການການເງິນ ເປັນຕົ້ນ ກອງທຶນການຮ່ວມມືດ້ານການລົງທຶນຈີນ-ອາຊຽນ ທີ່ພວມພັດທະນາ ກໍໄດ້ສ້າງໂອກາດສຳຄັນໃຫ້ແກ່ການພັດທະນາພື້ນຖານໂຄງລ່າງຂອງພາກພື້ນອາຊຽນ.