ຫຼັງຈາກໄດ້ອະນຸມັດສັນຍາອອກແບບການກໍ່ສ້າງໄລຍະ 1 ຂອງໂຄງການຮ່ວມມືທາງລົດໄຟໄທ-ຈີນຕອນນະຄອນຫຼວງບາງກອກ-ແຂວງນະຄອນຣາຊະສີມາ ໃນວັນທີ 22 ສິງຫານີ້ແລ້ວ, ລັດຖະບານໄທກໍໄດ້ອະນຸມັດສັນຍາຕິດຕາມຄຸ້ມຄອງໂຄງການດັ່ງກ່າວອີກໃນວັນທີ 29 ເດືອນດຽວກັນ.
ເວັບໄຊລັດຖະບານໄທ ໄດ້ເຜີຍແຜ່ບົດບັນທຶກກອງປະຊຸມລັດຖະບານ ໂດຍຊີ້ໃຫ້ເຫັນວ່າ: ກອງປະຊຸມລັດຖະບານໄດ້ອະນຸມັດສັນຍາດັ່ງກ່າວແລ້ວ, ຂະນະດຽວກັນ ກໍໄດ້ເພີ່ມງົບປະມານຕິດຕາມຄຸ້ມຄອງໂຄງການຈາກ 1 ຕື້ 649 ລ້ານບາດ ຂຶ້ນເປັນ 3 ຕື້ 500 ລ້ານບາດ, ແຕ່ງົບປະມານລວມຂອງໂຄງການບໍ່ມີການປ່ຽນແປງ ຄືມີມູນຄ່າ 179 ຕື້ 400 ລ້ານບາດ.
ທ່ານກອບສັກ ພູຕະກຸນ ຮອງລັດຖະມົນຕີປະຈຳສຳນັກງານນາຍົກລັດຖະມົນຕີໄທ ໄດ້ຖະແຫຼງຂ່າວຫຼັງກອງປະຊຸມລັດຖະບານວ່າ: ການເພີ່ມງົບປະມານຄືດັ່ງກ່າວ ເນື່ອງຈາກໄດ້ເພີ່ມວຽກງານກ່ຽວກັບຄວາມປອດໄພໃນການກໍ່ສ້າງໂຄງການ ແລະວຽກງານອື່ນໆໃສ່.
ເມື່ອບໍ່ດົນຜ່ານມາ, ສະຖານທູດຈີນປະຈຳໄທ ໄດ້ແຈ້ງວ່າ: ປັດຈຸບັນ, ຈີນແລະໄທພວມຂຸ້ນຂ້ຽວເຮັດວຽກ ເພື່ອຈະໄດ້ເຊັນສັນຍາໃນຕົ້ນເດືອນກັນຍາໜ້ານີ້ ແລະອາດຈະເລີ່ມປະຕິບັດໂຄງການໃນເດືອນຕຸລາປີນີ້.