ກອງປະຊຸມເຈົ້າໜ້າທີ່ຂັ້ນສູງຄັ້ງທີ 3 ຂອງກອງປະຊຸມສຸດຍອດອົງການອາເປັກ 2017 ໄດ້ຈັດຂຶ້ນຢູ່ນະຄອນໂຮ່ຈິມິງ ສສ ຫວຽດນາມໃນວັນທີ 29 ສິງຫານີ້ ໂດຍຈະເນັ້ນເສດຖະກິດ, ການຄ້າ, ການລົງທຶນ ແລະອື່ນໆ.
ກອງປະຊຸມດັ່ງກ່າວຈະດຳເນີນ 2 ວັນ ໂດຍຜູ້ແທນຈາກກຸ່ມເສດຖະກິດທີ່ເປັນສະມາຊິກອາເປັກ, ສຳນັກເລຂາອາຊຽນ, ຄະນະກຳມະການຮ່ວມມືເສດຖະກິດປາຊີຟິກ, ສະພາມົນຕີການປຶກສາອຸດສາຫະກຳການຄ້າອາເປັກ ແລະອື່ນໆ ເກືອບ 200 ທ່ານເຂົ້າຮ່ວມ ເຊິ່ງຕົ້ນຕໍຈະທົບທວນຄືນໝາກຜົນທີ່ໄດ້ຮັບນັບແຕ່ກອງປະຊຸມເຈົ້າໜ້າທີ່ຂັ້ນສູງຄັ້ງທີ 2 ເປັນຕົ້ນມາ ແລະ ກວດກາຄວາມຄືບໜ້າຂອງວຽກງານທຸກຢ່າງເພື່ອກະກຽມໃຫ້ແກ່ກິດຈະກຳຕ່າງໆຂອງອາເປັກໃນຕໍ່ໜ້າ.
ມື້ດຽວກັນ, ຜູ້ແທນທີ່ເຂົ້າຮ່ວມກອງປະຊຸມໄດ້ປຶກສາຫາລືກ່ຽວກັບການປະຕິຮູບກົນໄກ ແລະ ໂຄງປະກອບ, ການພັດທະນາຊັບພະຍາກອນມະນຸດ, ເປົ້າໝາຍໂບກໍ (Bogor Goals), ການຄ້າຜ່ານທາງເອເລັກໂຕຣນິກ, ສັນຍາການຄ້າໃນພາກພື້ນ, ສັນຍາການຄ້າເສລີ, ເຂດການຄ້າເສລີອາຊີປາຊີຟິກ, ອຸດສາຫະກຳສຳຮອງ ແລະອື່ນໆເປັນຕົ້ນຕໍ.
ກອງປະຊຸມສຸດຍອດອົງການອາເປັກ 2017 ຈະຈັດຂຶ້ນຢູ່ນະຄອນດານັງ ສສ ຫວຽດນາມໃນເດືອນພະຈິກປີນີ້.
