ກະຊວງການຕ່າງປະເທດຈີນໄດ້ຈັດພິທີຖະແຫຼງຂ່າວໃນວັນທີ 30 ສິງຫານີ້ ໂດຍທ່ານຫວາງຢີ້ ລັດຖະມົນຕີກະຊວງດັ່ງກ່າວໄດ້ແຈ້ງໃຫ້ຮູ້ວ່າ: ທ່ານສີຈິ້ນຜິງ ປະທານປະເທດຈີນ ຈະເປັນປະທານກອງປະຊຸມຜູ້ນຳປະເທດບຣິກສ ຄັ້ງທີ 9 ແລະ ກອງປະຊຸມພົບປະລະຫວ່າງປະເທດທີ່ເປັນຕະຫຼາດພັດທະນາໃໝ່ ແລະ ປະເທດພວມພັດທະນາ ທັງໄດ້ຕອບຄຳຖາມຂອງນັກຂ່າວ.
ທ່ານຫວາງຢີ້ ກ່າວວ່າ: ກອງປະຊຸມພົບປະລະຫວ່າງຜູ້ນຳປະເທດບຣິກສ ຄັ້ງທີ 9 ຈະຈັດຂຶ້ນໃນໄວໆນີ້ ໂດຍທ່ານສີຈິ້ນຜິງ ປະທານປະເທດຈີນ ແລະຜູ້ນຳຈາກປະເທດບຣິກສ ຈະແລກປ່ຽນຄວາມເຫັນກ່ຽວກັບການຮ່ວມມື ແລະ ບັນຫາທີ່ສົນໃຈຮ່ວມກັນຢ່າງເລິກເຊິ່ງ. ໃນໄລຍະກອງປະຊຸມ, ຈີນຍັງຈະຈັດກອງປະຊຸມພົບປະລະຫວ່າງປະເທດທີ່ເປັນຕະຫຼາດພັດທະນາໃໝ່ ແລະ ປະເທດພວມພັດທະນາອີກ. ເມື່ອເຖິງເວລານັດໝາຍ, ຜູ້ນຳປະເທດບຣິກສ ແລະ ເອຢິບ, ກີເນ, ແມັກຊິກ, ຕາຈີກິສະຖານ ແລະ ໄທ ຈະເດີນທາງເຂົ້າຮ່ວມກອງປະຊຸມຢູ່ເມືອງເຊ້ຍເໝິນ ເພື່ອປຶກສາຫາລືແຜນການໃຫຍ່ໃນການຮ່ວມມືລະຫວ່າງຕະຫຼາດພັດທະນາໃໝ່ ແລະປະເທດພວມພັດທະນາ. ສ່ວນຕອນບ່າຍວັນທີ 3 ຫາຕອນເຊົ້າວັນທີ 4 ກັນຍາ, ຈີນຈະຈັດກອງປະຊຸມເວທີປຶກສາຫາລືອຸດສາຫະກຳການຄ້າປະເທດບຣິກສ ທີ່ມີຂະໜາດໃຫຍ່ທີ່ສຸດໃນປັດຈຸບັນ ໂດຍທ່ານສີຈິ້ນຜິງ ປະທານປະເທດຈີນຈະເຂົ້າຮ່ວມພິທີເປີດກອງປະຊຸມດັ່ງກ່າວ ທັງກ່າວປາໄສ ແລະ ຕອນເຊົ້າວັນທີ 4 ກັນຍາ, ກອງປະຊຸມພົບປະລະຫວ່າງຜູ້ນຳປະເທດບຣິກສ ກໍຈະຈັດຂຶ້ນຢູ່ສູນປະຊຸມສາກົນເມືອງເຊ້ຍເໝິນ. ທ່ານຫວາງຢີ້ ຊີ້ວ່າ: ການກຳເນີດກົນໄກບຣິກສ ແມ່ນຄວາມເປັນຈິງທີ່ຕ້ອງເປັນໄປຕາມການຜັນແປຂອງສະຖານະການໂລກ ແລະ ການຊັ່ງຊາລະຫວ່າງກຸ່ມກຳລັງຕ່າງໆ ໃນໂລກ; ການພັດທະນາຂອງກົນໄກບຣິກສ ໄດ້ບົ່ງບອກວ່າ ຕະຫຼາດພັດທະນາໃໝ່ ແລະ ປະເທດພວມພັດທະນາ ຈະມີຖານະແລະບົດບາດໃນການຄຸ້ມຄອງທົ່ວໂລກສູງຂຶ້ນເລື້ອຍໆ. ແນວໃດກໍດີ, ຜ່ານການພັດທະນາມາເປັນເວລາ 10 ປີ, ປະເທດບຣິກສ ໄດ້ກາຍເປັນກຳລັງສຳຄັນ ໃນການຊຸກຍູ້ການເຕີບໂຕຂອງເສດຖະກິດໂລກ ລວມທັງຊຸກຍູ້ການປະຕິຮູບຄວາມເປັນລະບຽບຮຽບຮ້ອຍຂອງໂລກ ແລະ ຮັກສາສັນຕິພາບ ແລະ ສະຖຽນລະພາບຂອງໂລກ ແລະ ປີນີ້, ການຮ່ວມມືບຣິກສ ກໍເລີ່ມເຂົ້າສູ່ທົດສະວັດທີ 2 ແລະຈີນກໍແບກຫາບຄວາມຮັບຜິດຊອບໃນການເປັນປະທານໝູນວຽນບຣິກສ ໃນຈຸດສຳຄັນທີ່ສືບທອດລະຫວ່າງກ່ອນແລະຫຼັງ, ຈາກອັນເກົ່າຂະຫຍາຍສູ່ອັນໃໝ່ຕໍ່ຈາກນີ້ໄປ. ຂະນະທີ່ໃນໂລກປັດຈຸບັນ, ສະຖານະການສາກົນກໍປ່ຽນແປງຢ່າງສະຫຼັບສັບຊ້ອນ ໂດຍປະເທດບຣິກສ ໃນຖານະເປັນຕົວແທນຂອງຕະຫຼາດພັດທະນາໃໝ່ ແລະ ປະເທດພວມພັດທະນາ ຍ່ອມມີຄວາມຮັບຜິດຊອບ ແລະກໍມີຄວາມສາມາດເສີມຂະຫຍາຍບົດບາດທີ່ຕັ້ງໜ້າແລະສ້າງສັນ ເພື່ອຮັບມືກັບສິ່ງທ້າທາຍລວມຕ່າງໆໃນທົ່ວໂລກ. ແນວໃດກໍດີ, ຈີນຍິນດີສຸມທຸກຄວາມພະຍາຍາມຮ່ວມກັບປະເທດສະມາຊິກອື່ນໆ ພັດທະນາກົນໄກຮ່ວມມືບຣິກສ ໃຫ້ຂະຫຍາຍຕົນ, ຕິດແທດຕົວຈິງ ແລະ ເຂັ້ມແຂງຍິ່ງໆຂຶ້ນ, ຍົກລະດັບກົນໄກບຣິກສ ໃຫ້ສູງຂຶ້ນ ເພື່ອສ້າງຄວາມຜາສຸກໃຫ້ແກ່ປະຊາຊົນ 5 ປະເທດບຣິກສ ທັງເປັນປະໂຫຍດຕໍ່ທົ່ວໂລກຕື່ມອີກ.
