ເຈົ້າໜ້າທີ່ສຳນັກເລຂາທິການກອງປະຊຸມສຸດຍອດທຸລະກິດແລະການລົງທຶນຈີນ-ອາຊຽນເປີດເຜີຍໃນວັນທີ 29 ສິງຫານີ້ວ່າ, ກອງປະຊຸມສຸດຍອດທຸລະກິດແລະການລົງທຶນຈີນ-ອາຊຽນຄັ້ງທີ 14 ທີ່ຈະຈັດຂຶ້ນຢູ່ເມືອງໜານໜິງເຂດປົກຄອງຕົນເອງເຜົ່າຈ້ວງກວາງຊີແຕ່ວັນທີ 12 ຫາ 15 ກັນຍາປີນີ້ ຈະສ້າງເວທີຮ່ວມມືເສດຖະກິດການຄ້າຈີນ-ອາຊຽນຄົບວົງຈອນ ດ້ວຍການສົນທະນາແລະຈັດກິດຈະກຳໃນຂະແໜງການອຸດສາຫະກຳການຄ້າສອງຝ່າຍຫຼືຫຼາຍຝ່າຍ ເພື່ອສ້າງໂອກາດການຄ້າແລະການລົງທຶນໃຫ້ແກ່ວິສາຫະກິດຫຼາຍກວ່າເກົ່າ.
ຂ່າວແຈ້ງວ່າ, ກອງປະຊຸມສຸດຍອດຄັ້ງນີ້ຈະເນັ້ນ "ຮ່ວມກັນສ້າງເສັ້ນທາງສາຍໄໝທາງທະເລໃນສະຕະວັດທີ 21 ແລະຊຸກຍູ້ເສດຖະກິດພາກພື້ນເຊື່ອມໂຍງເຂົ້າກັນດ້ວຍການທ່ອງທ່ຽວ" ແລະຈະຈັດກິດຈະກຳຕ່າງໆເຊັ່ນ: ກອງປະຊຸມໂຕະມົນຜູ້ນຳປະເທດກິດຕິມະສັກກັບນັກທຸລະກິດຈີນ, ກອງປະຊຸມເວທີປຶກສາຫາລືຫົວໜ້າການຄ້າຈີນ-ອາຊຽນ ແລະອື່ນໆ.
ໃນຖານະເປັນເວທີກາງແຫ່ງການເປີດປະຕູແລະຮ່ວມມືລະຫວ່າງອາຊຽນກັບຈີນ, ກອງປະຊຸມສຸດຍອດທຸລະກິດແລະການລົງທຶນຈີນ-ອາຊຽນໄດ້ເປີດກວ້າງຂອບເຂດບໍລິການຂອງຕົນມາໂດຍຕະຫຼອດ ແລະຮັບໃຊ້ການສ້າງ "ໜຶ່ງແລວທາງໜຶ່ງເສັ້ນທາງ". ນັບແຕ່ຈັດຂຶ້ນເປັນຄັ້ງທຳອິດເມື່ອປີ 2004 ເປັນຕົ້ນມາ, ມີຜູ້ນຳຈີນແລະອາຊຽນ 48 ທ່ານໄດ້ເຂົ້າຮ່ວມພິທີເປີດກອງປະຊຸມສຸດຍອດດັ່ງກ່າວ. ປັດຈຸບັນ, ກອງປະຊຸມຕ່າງໆຂອງກອງປະຊຸມສຸດຍອດໄດ້ຊຸກຍູ້ໃຫ້ວິສາຫະກິດຈີນໄປລົງທຶນຫຼາຍໂຄງການໃຫຍ່ຢູ່ຫວຽດນາມ, ອິນໂດເນເຊຍ, ມາເລເຊຍ ແລະປະເທດອື່ນໆໃນອາຊຽນ ແລະໂດຍລວມແລ້ວມີມູນຄ່າການຮ່ວມມືຫຼາຍກວ່າ 30 ຕື້ໂດລາ.
 |
