ຫວ່າງມໍ່ໆມານີ້, ທ່ານ ຊາເຄັງ ຮອງນາຍົກລັດຖະມົນຕີທັງເປັນລັດຖະມົນຕີກະຊວງພາຍໃນປະເທດກຳປູເຈຍໄດ້ຂໍໃຫ້ສານສູງສຸດປະເທດຕົນ ຍຸບ 9 ພັກການເມືອງທີ່ລະເມີດກົດໝາຍພັກການເມືອງ.
ໜັງສືພິມ Khmer Daily ສະບັບພາສາຈີນຢູ່ທ້ອງຖິ່ນລາຍງານວ່າ: ທ່ານ ຊາເຄັງ ກ່າວຕໍ່ສານສູງສຸດກຳປູເຈຍວ່າ: ທັງ 9 ພັກການເມືອງບໍ່ໄດ້ຍື່ນບົດລາຍງານປະຈຳປີມາຫາກະຊວງຂອງຕົນ ເຊິ່ງເປັນການລະເມີດກົດໝາຍພັກການເມືອງ. ຂະນະທີ່ທາງພັກການເມືອງຍັງຖືກຟ້ອງຂຶ້ນສານຊັ້ນຕົ້ນພະນົມເປັນຕື່ມອີກ.
ທ່ານ ຊາເຄັງ ກ່າວອີກວ່າ: ມາຮອດປັດຈຸບັນ, ພັກດັ່ງກ່າວບໍ່ໄດ້ລົງທະບຽນຕື່ມແລະບໍ່ປະຕິບັດໜ້າທີ່ພັກການເມືອງຕໍ່ກະຊວງພາຍໃນຕາມກົດໝາຍພັກການເມືອງ. ຈາກນີ້ຈຶ່ງໄດ້ຂໍໃຫ້ຜູ້ພິພາກສາສານສູງສຸດກຳປູເຈຍພິຈາລະນາແລະຕັດສິນຕາມໃບຂໍໃຫ້ຍຸບພັກດັ່ງກ່າວ.
ຂ່າວແຈ້ງວ່າ: ໃນການເລືອກຕັ້ງທ້ອງຖິ່ນຊຸດໃໝ່ທີ່ຈັດຂຶ້ນໃນເດືອນມິຖຸນາປີນີ້ ມີ 12 ພັກການເມືອງເຂົ້າຮ່ວມລົງເລືອກຕັ້ງ.