ຕອນບ່າຍວັນທີ 30 ສິງຫາ 2017 ນີ້, ທີ່ສໍານັກງານປົກຄອງນະຄອນຫຼວງວຽງຈັນ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍຄະນະ ໄດ້ຕ້ອນຮັບທ່ານ ເສິງ ຫຼຽນຢວນ ຄະນະພັກແຂວງຢຸນນານ, ເລຂາຄະນະພັກນະຄອນຄຸນໝິງ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ນະຄອນຫຼວງວຽງຈັນ ລະຫວ່າງວັນທີ 30-31 ສິງຫາ 2017ນີ້.
ໃນໂອກາດດັ່ງກ່າວ, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນໄດ້ຕີລາຄາສູງຕໍ່ການມາຢ້ຽມຂອງເຈົ້າຄອງນະຄອນຄຸນໝິງ ແລະ ຄະນະທັງກ່າວວ່າ, ໃນໂອກາດຄົບຮອບ 6 ປີການແຮກສ່ຽວແລະໃນຕໍ່ໜ້າ, ນະຄອນຫຼວງວຽງຈັນເຫັນດີເພີ່ມທະວີການຮ່ວມມື ດ້ວຍນ້ຳໃຈມິດຕະພາບ, ຍິນດີຮ່ວມມືພັດທະນາການທ່ອງທ່ຽວ, ອຸດສາຫະກໍາ, ການປຸງແຕ່ງແລະການຫຸ້ມຫໍ່ອາຫານ, ການປູກດອກໄມ້ໃນເຂດຮ້ອນ, ການພັດທະນາຕົວເມືອງ ແລະ ການແລກປ່ຽນຄະນະຜູ້ແທນລະດັບຕ່າງໆກັບຈີນ.
ທ່ານ ເສິງ ຫຼຽນຢວນ ຄະນະພັກແຂວງຢຸນນານ, ເລຂາຄະນະພັກນະຄອນຄຸນໝິງ ກ່າວວ່າ: ພວກເຮົາຄວນເພີ່ມທະວີການພົວພັນການທ່ອງທ່ຽວ ແລະອຸດສາຫະກໍາ ເຊິ່ງປັດຈຸບັນຄຸນໝິງກໍາລັງພັດທະນາໃຫ້ເປັນເຂດການຄ້າເສດຖະກິດ, ສູນວັດທະນະທໍາ, ສູນໃຈກາງຂອງເຕັກນິກວິທະຍາສາດ ແລະ ສູນກາງການເງິນໃນພາກພື້ນ ເພື່ອຈະເຮັດໃຫ້ ເຂດພາກພື້ນໄດ້ພົວພັນກັນຢ່າງແໜ້ນແຟ້ນ ແລະ ເປັນການປະຕິບັດຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງທ່ານສີຈິ້ນຜິງ ໃຫ້ປະກົດຜົນເປັນຈິງ. ຈາກນີ້, ຂ້າພະເຈົ້າຍິນດີທີ່ຈະຮ່ວມມື ກັບນະຄອນຫຼວງວຽງຈັນໃຫ້ຫຼາຍຂຶ້ນ ໂດຍຈະລະດົມຫຼາຍວິສະຫະກິດເຂົ້າມາລົງທຶນເພື່ອສ້າງໂອກາດໃຫ້ ນັກທຸລະກິດທັງສອງນະຄອນໄດ້ແລກປ່ຽນເຊິ່ງກັນແລະກັນ ແລະຫວັງວ່າໃນຕໍ່ໜ້ານະຄອນຫຼວງວຽງຈັນ ຈະສືບຕໍ່ເພີ່ມທະວີການຮ່ວມມືຫຼາຍຂຶ້ນ ແລະ ຊີ້ນຳ ເພື່ອນໍາໄປປະຕິບັດແລະຜັນຂະຫຍາຍໃຫ້ເປັນຈິງ. ຂະນະດຽວກັນ ໃນຕໍ່ໜ້າຈະພະຍາຍາມເຮັດໃຫ້ຕົວເມືອງ ທີ່ມີການທ່ອງທ່ຽວອ້ອມຂ້າງເຕົ້າໂຮມເປັນສະຫະພັນຕົວເມືອງທ່ອງທ່ຽວ ເພື່ອຊຸກຍູ້ການພົວພັນຮ່ວມມື ດ້ານນີ້ໃຫ້ດີຂຶ້ນ. ໂອກາດດັ່ງກ່າວ ທ່ານໄດ້ເຊີນນະຄອນຫຼວງວຽງຈັນເຂົ້າຮ່ວມຕະຫຼາດນັດ ທີ່ນະຄອນຄຸນໝິງຈັດຂຶ້ນທຸກໆປີ ເພື່ອນຳສະເໜີການທ່ອງທ່ຽວຂອງນະຄອນຫຼວງວຽງຈັນ.
