ພິທີຊົມເຊີຍຜົນສຳເລັດໂຄງການ "ປ່າສາທິດຊີວະພາບມິດຕະພາບຈີນ-ມຽນມາ" ເຊິ່ງເປັນຜົນງານການຮ່ວມມືລະຫວ່າງສະຖານທູດຈີນປະຈຳມຽນມາ ແລະ ກະຊວງຊັບພະຍາກອນທຳມະຊາດ ແລະ ການອະນຸລັກສິ່ງແວດລ້ອມມຽນມາ ໄດ້ຈັດຂຶ້ນຢູ່ເມືອງເຕືອງວິງຍີ ແຂວງມັກເວ ປະເທດມຽນມາ ໃນວັນທີ 31 ສິງຫາຜ່ານມາ ໂດຍທ່ານອອງວິນ ລັດຖະມົນຕີກະຊວງຊັບພະຍາກອນທຳມະຊາດ ແລະ ການອະນຸລັກສິ່ງແວດລ້ອມມຽນມາ ແລະ ທ່ານຫົງລ້ຽງ ເອກອັກຄະລັດຖະທູດຈີນປະຈຳມຽນມາ ພ້ອມດ້ວຍຜູ້ຕາງໜ້າວິສາຫະກິດຈີນຢູ່ມຽນມາຈຳນວນໜຶ່ງເຂົ້າຮ່ວມ.
ໂຄງການ "ປ່າສາທິດຊີວະພາບມິດຕະພາບຈີນ-ມຽນມາ" ໄດ້ຈັດພິທີເລີ່ມດຳເນີນຢູ່ນະຄອນຢາງກຸ້ງ ໃນເດືອນຕຸລາປີຜ່ານມາ ຫຼັງກົມຄຸ້ມຄອງປ່າໄມ້ ກະຊວງຊັບພະຍາກອນທຳມະຊາດ ແລະ ການອະນຸລັກສິ່ງແວດລ້ອມມຽນມາ, ສະຖານທູດຈີນປະຈຳມຽນມາ ແລະ ສູນສຶກສາຄົ້ນຄວ້າຊີວະນານາພັນອາຊີຕາເວັນອອກສຽງໃຕ້ ສະຖາບັນວິທະຍາສາດແຫ່ງຊາດຈີນ ຮ່ວມກັນລົງນາມໃນບົດບັນທຶກຄວາມເຂົ້າໃຈ. ຕາມແຜນການຂອງໂຄງການ, ສະຖານທູດຈີນອອກທຶນກວ່າ 400 ລ້ານຈາດ ຫຼື ປະມານ 2 ລ້ານຢວນເພື່ອກ້າເບ້ຍໄມ້ປະມານ 1 ແສນ 5 ໝື່ນເບ້ຍຢູ່ບໍລິເວນດິນເຮື້ອ 40 ເຮັກຕາໃນເຂດປ່າສະຫງວນເມືອງເຕືອງວິງຍີ ແຂວງມັກເວປະເທດມຽນມາ ແລະກະຊວງຊັບພະຍາກອນທຳມະຊາດແລະການອະນຸລັກສິ່ງແວດລ້ອມປະເທດດັ່ງກ່າວເປັນຜູ້ຮັບຜິດຊອບປູກ ແລະ ບົວລະບັດຮັກສາ.
