ວັນທີ 31 ສິງຫາຜ່ານມາ, ສປປ ເກົາຫຼີ ອອກມາປະກາດວ່າ: ຄັດຄ້ານຖະແຫຼງການຂອງປະທານສະພາຄວາມໝັ້ນຄົງສະຫະປະຊາຊາດຫຼັງປະເທດຕົນຍິງລູກສອນໄຟໄລຍະກາງແລະໄກ ແລະຢືນຢັນວ່າການຍິງລູກສອນໄຟແມ່ນການຕອບໂຕ້ອາເມລິກາ-ສ.ເກົາຫຼີ ຊ້ອມຮົບຮ່ວມ.
ຂ່າວສານສູນກາງຂອງ ສປປ ເກົາຫຼີ ລາຍງານວ່າ: ວັນທີ 31 ສິງຫາຜ່ານມາ, ໂຄສົກກະຊວງການຕ່າງປະເທດ ສປປ ເກົາຫຼີ ກ່າວວ່າ: ຫວ່າງມໍ່ໆມານີ້, ສະພາຄວາມໝັ້ນຄົງສະຫະປະຊາຊາດໄດ້ອອກຖະແຫຼງການຂອງປະທານສະບັບໜຶ່ງຕໍ່ກໍລະນີທີ່ ສປປ ເກົາຫຼີ ທົດສອບການຍິງລູກສອນໄຟໄລຍະກາງແລະໄກ ໂດຍຖະແຫຼງການດັ່ງກ່າວໄດ້ບິດເບືອນຄວາມຈິງ, ແມ່ນຄວາມປ່າເຖື່ອນທີ່ທຳລາຍສິດປ້ອງກັນຕົວຂອງປະເທດອະທິປະໄຕ, ສປປ ເກົາຫຼີ ຈຶ່ງຄັດຄ້ານຢ່າງຮອບດ້ານຕໍ່ເລື່ອງນີ້.
ໂຄສົກທ່ານດັ່ງກ່າວຍັງກ່າວຕື່ມວ່າ: ການທົດສອບຍິງລູກສອນໄຟຄັ້ງນີ້ເປັນກ້າວທຳອິດໃນການຕອບໂຕ້ຢ່າງເດັດຂາດຕໍ່ການຊ້ອມຮົບຮ່ວມຂອງກອງປ້ອງກັນຕົວເພື່ອອິດສະຫຼະ(UFG)ອາເມລິກາ-ສ.ເກົາຫຼີ. ຂະນະດຽວກັນ,ອາເມລິກາບໍ່ເຄີຍເອົາຫົວໃສ່ໃຈຊາຕໍ່ການຕັກເຕືອນແລະຮັບເອົາມາດຕະການຫຼຸດຜ່ອນສະຖານະການຂອງ ສປປ ເກົາຫຼີ ແຕ່ປະການໃດ ເຊິ່ງປະເທດຕົນບໍ່ມີທາງເລືອກອື່ນໃດ ນອກຈາກການຕອບໂຕ້ດ້ວຍກຳລັງເທົ່ານັ້ນ ແລະເປົ້າໝາຍໃນຕໍ່ໜ້າ ສປປ ເກົາຫຼີ ຍັງຈະຖືມະຫາສະໝຸດປາຊີຟິກດຳເນີນການທົດສອບຍິງລູກສອນໄຟໃຫ້ຫຼາຍກວ່າເກົ່າ ເພື່ອຊຸກຍູ້ອາວຸດຍຸດທະປະກອນຫັນເປັນແບບທັນສະໄໝແລະການສູ້ຮົບຕົວຈິງ.
 |
