ທ່ານດອນ ປຣະມັດວິໄນ, ລັດຖະມົນຕີກະຊວງການຕ່າງປະເທດໄທກ່າວໃນວັນທີ 31 ສິງຫາຜ່ານມາວ່າ, ປັດຈຸບັນ, ລັດຖະບານຕົນຍັງບໍ່ສາມາດຮູ້ບ່ອນຢູ່ຂອງທ່ານນາງຍິ່ງລັກ ຊິນນະວັດ ອະດີດນາຍົກລັດຖະມົນຕີເທື່ອແລະກໍບໍ່ສາມາດຢືນຢັນຕໍ່ແຫຼ່ງຂ່າວກ່ຽວກັບບ່ອນຢູ່ໄດ້ຢ່າງຈະແຈ້ງ.
ທ່ານນາງຍິ່ງລັກ ຊິນນະວັດ ບໍ່ຂຶ້ນສານຮັບຟັງຄຳຕັດສິນ "ຄະດີຮັບຈຳນຳເຂົ້າສານ" ໃນວັນທີ 25 ສິງຫາຜ່ານມາ.
ທ່ານດອນ ກ່າວວ່າ, ຖ້າລັດຖະບານຮູ້ບ່ອນຢູ່ຂອງທ່ານຍິ່ງລັກແລ້ວ, ຈະຮຽກຮ້ອງໃຫ້ປະເທດຕ່າງໆຮ່ວມມື, ແຕ່ວ່າມາຮອດປັດຈຸບັນຍັງບໍ່ມີຂ່າວຢ່າງຈະແຈ້ງເທື່ອ. ແນວໃດກໍດີ, ກະຊວງການຕ່າງປະເທດຕົນກໍໄດ້ຕິດຕໍ່ກັບປະເທດຈຳນວນໜຶ່ງທີ່ທ່ານຍິງລັກອາດຈະເດີນທາງໄປຕາມການລາຍງານ, ແຕ່ບໍ່ໄດ້ຄຳຕອບແຕ່ປະການໃດ.
ກ່ອນໜ້ານີ້, ມີການກ່າວວ່າລັດຖະບານໄທໄດ້ຕັ້ງໃຈປ່ອຍທ່ານນາງຍິ່ງລັກອອກຈາກປະເທດເນື່ອງຈາກໄດ້ມີການຕົກລົງກັນ, ແຕ່ລັດຖະບານໄທໄດ້ປະຕິເສດຕໍ່ກະແສຂ່າວດັ່ງກ່າວ.
 |
