ວັນທີ 1 ກັນຍານີ້,ທ່ານນາງຮວ້າຊຸ່ນຢີງ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຂ່າວວ່າ: ກອງປະຊຸມໜ່ວຍງານປະສົມເພື່ອຜັນຂະຫຍາຍ"ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້"ຄັ້ງທີ 22 ໄດ້ຈັດຂຶ້ນຢູ່ຟີລິບປິນໃນວັນທີ 30 ສິງຫາແລ້ວນີ້. ກອງປະຊຸມໄດ້ດຳເນີນໄປຢ່າງມີໄມຕີຈິດມິດຕະພາບ, ຈະເປັນການເລີ່ມຕົ້ນທີ່ດີສຳລັບການປຶກສາຫາລືກ່ຽວກັບ"ກົດແຫ່ງການປະພຶດຢູ່ທະເລຈີນໃຕ້".
ທ່ານນາງຮວ້າຊຸ່ນຢີງຍັງກ່າວຕື່ມວ່າ: ວັນທີ 30 ສິງຫາແລ້ວນີ້, ຈີນແລະປະເທດໃນອາຊຽນໄດ້ຈັດກອງປະຊຸມໜ່ວຍງານປະສົມຄັ້ງທີ 22 ຢູ່ນະຄອນຫຼວງມະນີລາປະເທດຟີລິບປີນກ່ຽວກັບການປະຕິບັດ"ຖະແຫຼງການ ແຫ່ງການປະພຶດຂອງບັນດາຝ່າຍໃນທະເລຈີນໃຕ້". ກອງປະຊຸມເທື່ອນີ້ມີຈຸດປະສົງເພື່ອຜັນຂະຫຍາຍບາດກ້າວທີ 2 ໃນໂຄງຄວາມຄຶດ" 3 ບາດກ້າວ"ກ່ຽວກັບການປຶກສາຫາລື"ກົດແຫ່ງການປະພຶດຢູ່ທະເລຈີນໃຕ້"ທີ່ທ່ານຫວາງອີ້ ລັດຖະມົນຕີກະຊວງການຕ່າງປະເທດຈີນໄດ້ສະເໜີໃນກອງປະຊຸມລັດຖະມົນຕີການຕ່າງປະເທດຈີນ-ອາຊຽນຫວ່າງກ່ອນນີ້, ກອງປະຊຸມດຳເນີນໄປຢ່າງມີໄມຕີຈິດມິດຕະພາບ. ບັນດາຝ່າຍໄດ້ແລກປ່ຽນຄວາມຄິດຄວາມເຫັນຢ່າງກົງໄປກົງມາແລະເລິກເຊິ່ງໂດຍໝູນອ້ອມຫົວຂໍ້ຕ່າງໆເຊັ່ນ ການປະຕິບັດ"ຖະແຫຼງການ",ການປຶກສາຫາລື"ກົດແຫ່ງການປະພຶດ,ການຮ່ວມມືຕົວຈິງທາງທະເລແລະອື່ນໆ, ແລະໄດ້ກຳນົດຫຼັກການ ຊ່ອງທາງ ຮູບການ ແລະກົນໄກເຮັດວຽກຂອງການປຶກສາຫາລື"ກົດແຫ່ງການປະພຶດ"ໄລຍະຕໍ່ໄປ, ແລະໄດ້ມີຄວາມຮັບຮູ້ທີ່ເປັນເອກະພາບກັນ. ນີ້ຈະເປັນການເລີ່ມຕົ້ນທີ່ດີສຳລັບການປຶກສາຫາລື"ກົດແຫ່ງການປະພຶດ"ໄລຍະຕໍ່ໄປ. ກ່ອນໄຂກອງປະຊຸມ, ຊ່ຽວຊານ ນັກວິຊາການຂອງຝ່າຍຕ່າງໆຍັງໄດ້ຈັດງານສຳມະນາສະເພາະໂດຍສຸມໃສ່ບັນຫາການຮ່ວມມືຕົວຈິງທາງທະເລ ແລະໄດ້ມີຄວາມຮັບຮູ້ທີ່ເປັນເອກະພາບກັນຢ່າງກວ້າງຂວາງ.
 |
