ວັນທີ 3 ກັນຍານີ້ ສ.ເກົາຫຼີລາຍງານວ່າ, ຕອນທ່ຽງມື້ດຽວກັນ ຢູ່ ສປປ ເກົາຫຼີເກີດ "ແຜ່ນດິນໄຫວ" ແລະປັດຈຸບັນກຳລັງວິເຄາະສາເຫດທີ່ພາໃຫ້ເກີດແຜ່ນດິນໄຫວເທື່ອນີ້ແມ່ນຍ້ອນ ສປປ ເກົາຫຼີດຳເນີນການທົດລອງນິວເຄລຍຄັ້ງທີ 6 ຫຼືບໍ.
ສື່ມວນຊົນ ສ.ເກົາຫຼີໄດ້ອ້າງຕາມແຫຼ່ງຂ່າວຈາກອົງການຕິດຕາມແຜ່ນດິນໄຫວປະເທດຕົນມາລາຍງານວ່າ, ໄດ້ສຳຫຼວດເຫັນວ່າຢູ່ເຂດຮາມກຸງບຸກໂດຂອງ ສປປເກົາຫຼີເກີດ "ແຜ່ນດິນໄຫວ" ລະດັບ 5,7 ລິກເຕີໃນເວລາ 10 ໂມງເຄິ່ງຕາມເວລາວຽງຈັນ. ຫຼັງຈາກນັ້ນ ເຈົ້າໜ້າທີ່ທະຫານ ສ.ເກົາຫຼີ ໄດ້ຖະແຫຼງວ່າ ຢູ່ເຂດດັ່ງກ່າວເກີດ "ແຜ່ນດິນໄຫວທຽມ", ເຊິ່ງສົງໃສ່ວ່າ ສປປເກົາຫຼີໄດ້ດຳເນີນການທົດລອງນິວເຄລຍຄັ້ງທີ 6, ຂະນະທີ່ປະເທດຕົນກໍສັ່ງໃຫ້ໜ່ວຍງານຮັບມືສຸກເສີນເຫດການເຄື່ອນໄຫວນິວເຄລຍຂອງສປປ ເກົາຫຼີ ເລີ່ມດຳເນີນງານແລ້ວ.
ຂ່າວລາຍງານຕື່ມວ່າ, ຜົນການຢັ່ງແທກຈາກຕາໜ່າງສະຖານີແຜ່ນດິນໄຫວຈີນໃຫ້ຮູ້ວ່າ, ເວລາ 10 ໂມງເຄິ່ງຕາມເວລາວຽງຈັນ, ສປປ ເກົາຫຼີເກີດແຜ່ນດິນໄຫວລະດັບ 6,3 ລິກເຕີ ເຊິ່ງຈຸດໃຈກາງແຜ່ນດິນໄຫວຢູ່ເສັ້ນຂະໜານເໜືອ 41,35 ອົງສາ ແລະເສັ້ນແວງຕາເວັນອອກ 129,11 ອົງສາ, ເລິກລົງໃຕ້ດິນ 0 ກິໂລແມັດ.
 |
