ບໍລິສັດປະສົມ PCS ທີ່ຮ່ວມສ້າງຕັ້ງຂຶ້ນລະຫວ່າງບໍລິສັດກໍ່ສ້າງຈີນຫຸ້ນສ່ວນຈຳກັດສາຂາໄທ ແລະ ບໍລິສັດ PLE ໄທ ໄດ້ຊະນະການປະມູນໂຄງການສະໜາມບິນສຸວັນນະພູມປະເທດໄທ ເມື່ອບໍ່ດົນມານີ້.
ທັງນີ້, ບໍລິສັດກໍ່ສ້າງຈີນສາຂາໄທ ໄດ້ເປີດເຜີຍວ່າ: ບໍລິສັດມະຫາຊົນສະໜາມບິນໄທ AOT ໄດ້ແຈ້ງໃຫ້ບໍລິສັດຕົນຊາບວ່າ ໄດ້ຊະນະການປະມູນໂຄງການສະໜາມບິນສຸວັນນະພູມ ນະຄອນຫຼວງບາງກອກ ດ້ວຍມູນຄ່າ 14 ຕື້ 235 ລ້ານບາດ ເຊິ່ງເນື້ອທີ່ປຸກສ້າງຂອງໂຄງການແມ່ນ 2 ແສນ 1 ໝື່ນ 6.000 ຕາແມັດ, ເວລາການກໍ່ສ້າງຕາມສັນຍາແມ່ນ 660 ວັນ.
ບໍລິສັດກໍ່ສ້າງຈີນສາຂາໄທເຄີຍໄດ້ກໍ່ສ້າງໂຄງການໃຫຍ່ຫຼາຍໂຄງການມາກ່ອນແລ້ວ ເປັນຕົ້ນ ຂົວຣາມາ 8 ບາງກອກ, ຕຶກຫ້ອງການໃໝ່ຂອງອຳນາດການປົກຄອງນະຄອນຫຼວງບາງກອກ ແລະສູນວັດທະນະທຳຈີນຢູ່ບາງກອກ.
ບໍລິສັດແມ່ ຂອງບໍລິສັດກໍ່ສ້າງຈີນສາຂາໄທແມ່ນ ບໍລິສັດກໍ່ສ້າງຫຸ້ນສ່ວນຈຳກັດຈີນ, ແມ່ນກຸ່ມບໍລິສັດການລົງທຶນກໍ່ສ້າງທີ່ລຽງອັນດັບໜຶ່ງໃນໂລກ, ເປັນບໍລິສັດຮັບເໝົາກໍ່ສ້າງໂຄງການສະໜາມບິນສຳຄັນ 70% ແລະ ໂຄງການອາຄານສູງກວ່າ 300 ແມັດ 90% ຂອງຈີນ. ປີ 2016, ບໍລິສັດດັ່ງກ່າວໄດ້ຄອງອັນດັບໜຶ່ງໃນ 250 ວິສາຫະກິດສຸດຍອດຜູ້ຮັບເໝົາມກໍ່ສ້າງຂອງໂລກ ແລະໄດ້ຮັບການປະເມີນຄວາມໜ້າເຊື່ອຖືດ້ານສິນເຊື່ອໃນລະດັບສູງສຸດໃນຂະແໜງການກໍ່ສ້າງທົ່ວໂລກ.