ກອງປະຊຸມປຶກສາຫາລືສາກົນ "ການຮ່ວມມືໜຶ່ງແລວທາງໜຶ່ງເສັ້ນທາງ ແລະ ອະນຸພາກພື້ນແມ່ນ້ຳຂອງ--ແລວທາງແມ່ນ້ຳລ້ານຂ້າງ-ແມ່ນ້ຳຂອງ, ພັດທະນາຈະເລີນຂຶ້ນດ້ວຍສະຕິປັນຍາ" ໄດ້ຈັດຂຶ້ນຢູ່ແຂວງຊຽງໃໝ່ ປະເທດໄທ ໃນວັນທີ 1 ກັນຍານີ້ ໂດຍເຈົ້າໜ້າທີ່ລັດຖະບານ, ນັກທຸລະກິດ, ນັກວິຊາການຂອງຈີນແລະໄທ ພ້ອມດ້ວຍນັກການທູດສະຖານທູດ ແລະ ສະຖານກົງສຸນຂອງອາເມລິກາ, ອິນເດຍ, ອົສຕຣາລີ, ສິງກະໂປ ແລະ ມຽນມາ ປະຈຳໄທ ປະມານ 400 ທ່ານເຂົ້າຮ່ວມ.
ທ່ານເຣີນຢີ້ເຊິ່ງ, ຫົວໜ້າສະຖານກົງສຸນຈີນປະຈຳຊຽງໃໝ່ ໄດ້ກ່າວເປີດພິທີວ່າ: "ໜຶ່ງແລວທາງໜຶ່ງເສັ້ນທາງ" ໄດ້ສະໜອງເວທີຮ່ວມມືສຳຄັນໃຫ້ແກ່ການສ້າງປະຊາຄົມຮ່ວມຊາຕາກຳອາຊີ, ຈີນຊົມເຊີຍບັນດາປະເທດອະນຸພາກພື້ນແມ່ນ້ຳຂອງຊົມໃຊ້ໂອກາດສຳຄັນຈາກການພັດທະນາຂອງຈີນ. ຂະນະທີ່ໄທແມ່ນປະເທດສຳຄັນຢູ່ລຽບຕາມ "ເສັ້ນທາງສາຍໄໝທາງທະເລສະຕະວັດທີ 21", ການຮ່ວມມືລະຫວ່າງຈີນແລະໄທ ແລະລະຫວ່າງທ້ອງຖິ່ນຕ່າງໆຂອງຈີນກັບເຂດພາກເໜືອໄທ ມີກຳລັງບົ່ມຊ້ອນທີ່ມະຫາສານ.
ໃນກອງປະຊຸມໂຕະມົນແບ່ງເປັນຈຸ, ຜູ້ແທນທີ່ຮ່ວມປະຊຸມໄດ້ປຶກສາຫາລືຢ່າງກວ້າງຂວາງແລະເລິກເຊິ່ງ ກ່ຽວກັບການຮ່ວມມືດ້ານເສດຖະກິດການຄ້າ, ການທ່ອງທ່ຽວ, ກະສິກຳ, ການກໍ່ສ້າງພື້ນຖານໂຄງລ່າງ, ການເຊື່ອມຈອດ, ຕົວເມືອງທັນສະໄໝຮອບດ້ານ, ວັດທະນະທຳ ແລະ ການສຶກສາ ໂດຍປິ່ນອ້ອມຫົວຂໍ້ "ແລວທາງແມ່ນ້ຳລ້ານຂ້າງ-ແມ່ນ້ຳຂອງ, ພັດທະນາຈະເລີນຂຶ້ນດ້ວຍສະຕິປັນຍາ".