ຕອນບ່າຍວັນທີ 3 ກັນຍານີ້, ກອງປະຊຸມເວທີປຶກສາຫາລືອຸດສາຫະກຳການຄ້າປະເທດເບຣິກສ໌ໄດ້ຈັດຂຶ້ນຢູ່ເມືອງເຊ້ຍເໝີນ ສປ ຈີນ, ທ່ານສີຈິ້ນຜີງ ປະທານປະເທດຈີນໄດ້ກ່າວປາຖະກະຖາໃນພິທີເປີດປະຊຸມ. ທ່ານ ກ່າວວ່າ, ການຮ່ວມມືລະຫວ່າງປະເທດເບຣິກສ໌ພວມຢູ່ຈຸດສຳຄັນທີ່ສືບທອດອັນເກົ່າຂະຫຍາຍອັນໃໝ່ຕໍ່ໄປ, ພວກເຮົາຄວນຖອດຖອນບົດຮຽນທີ່ໄດ້ຜົນສຳເລັດ, ວາງວິໄສທັດການຮ່ວມມື, ກ້າວຂຶ້ນສູ່ເສັ້ນທາງພັດທະນາໃໝ່, ຮ່ວມກັນສ້າງ "ສິບປີຄຳ" ຄັ້ງທີສອງ.
ທ່ານສີຈິ້ນຜີງກ່າວວ່າ, ໃນ 10 ປີຜ່ານມາ, ປະເທດເບຣິກສ໌ຮ່ວມມືເພື່ອພັດທະນາຮ່ວມກັນແລະກາຍເປັນຈຸດຮຸ່ງໃສໃໝ່ຂອງເສດຖະກິດໂລກ. ເມື່ອທົບທວນຄືນປະຫວັດສາດຂອງການຮ່ວມມືປະເທດເບຣິກສ໌, ຂ້າພະເຈົ້າເຫັນວ່າມີຈຸດສຳຄັນ 3 ຈຸດ, ຄວນເສີມຂະຫຍາຍໃນການຮ່ວມມືໃນອະນາຄົດຄື. ໜຶ່ງ, ສະເໝີພາບກັນແລະສະແຫວງຫາສິ່ງທີ່ຄືກັນ ສະຫງວນສິ່ງທີ່ຕ່າງກັນ, ສອງ, ປະດິດສ້າງໃໝ່ແລະຕິດແທດຕົວຈິງ, ດຳເນີນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ແລະສາມ, ມີຈິດໃຈກວ້າງຂວາງ, ສ້າງຄວາມສຳເລັດຜົນຂອງຕົນບົນພື້ນຖານທີ່ໃຫ້ຜູ້ອື່ນກໍມີຄວາມສຳເລັດຜົນເຊັ່ນກັນ.
ທ່ານສີຈິ້ນຜີງ ກ່າວວ່າ, ປະເທດເບຣິກສ໌ໄດ້ຜະເຊີນກັບໜ້າທີ່ສຳຄັນທີ່ພັດທະນາເສດຖະກິດແລະເພີ່ມທະວີການຮ່ວມມື. ພວກເຮົາຄວນຮ່ວມກັນສ້າງ "ສິບປີຄຳ" ຄັ້ງທີສອງຂອງການຮ່ວມມື. ໜຶ່ງ, ລົງເລິກການຮ່ວມມືລະຫວ່າງປະເທດເບຣິກສ໌, ຊຸກຍູ້ໃຫ້ເສດຖະກິດຂອງ 5 ປະເທດເພີ່ມແມ່ແຮງການພັດທະນາ; ສອງ, ຫາບແບກຄວາມຮັບຜິດຊອບຢ່າງກ້າຫານ, ຮັກສາສັນຕິພາບແລະສະຖຽນລະພາບຂອງໂລກ, ສາມ, ເສີມຂະຫຍາຍບົດບາດຂອງປະເທດເບຣິກສຸ, ປັບປຸງໃຫ້ວິທີການຄຸ້ມຄອງເສດຖະກິດໂລກໃຫ້ສົມບູນຂຶ້ນ; ແລະສີ່, ຂະຫຍາຍອິດທິພົນຂອງປະເທດເບຣິກສ໌, ສ້າງສາຍພົວພັນຄູ່ຮ່ວມມືຢ່າງຮອບດ້ານ.