ແຫຼ່ງຂ່າວຈາກອົງການແຜ່ນດິນໄຫວຈີນໃຫ້ຮູ້ວ່າ: ເວລາ 11:30 ໂມງຂອງວັນທີ 3 ກັນຍານີ້, ຢູ່ ສປປ ເກົາຫຼີ ໂດຍເສັ້ນຂະໜານເໜືອ 41,35 ອົງສາ ແລະ ເສັ້ນແວງຕາເວັນອອກ 129,11 ອົງສາ ໄດ້ເກີດແຜ່ນດິນໄຫວລະດັບ 6,3 ຣິກເຕີ, ຈຸດສູນກາງແຜ່ນດິນໄຫວຢູ່ເລິກລົງໄປໃຕ້ດິນ 0 ແມັດ ແລະ ເວລາ 11:38 ໂມງຂອງວັນດຽວກັນ, ຢູ່ ສປປ ເກົາຫຼີ ໂດຍເສັ້ນຂະໜານເໜືອ 41,21 ອົງສາ ແລະເສັ້ນແວງຕາເວັນອອກ 129,18 ອົງສາ ກໍໄດ້ເກີດແຜ່ນດິນໄຫວລະດັບ 4,6 ຣິກເຕີ ເຊິ່ງຈຸດສູນກາງແຜ່ນດິນໄຫວຢູ່ເລິກລົງໄປໃຕ້ດິນ 0 ແມັດເຊັ່ນດຽວກັນ. ຈາກນີ້, ກະຊວງການຕ່າງປະເທດຈີນໄດ້ອອກຖະແຫຼງການໃນວັນດັ່ງກ່າວ ໂດຍຮັບຮອງວ່າ ສປປ ເກົາຫຼີໄດ້ດຳເນີນການທົດລອງນິວເຄລຍອີກຄັ້ງໃໝ່, ຂະນະທີ່ລັດຖະບານຈີນເດັດດ່ຽວຄັດຄ້ານ ທັງປະນາມຢ່າງຮຸນແຮງຕໍ່ການກະທຳດັ່ງກ່າວ.
ໃນເວລາ 11:46 ໂມງຂອງວັນດຽວກັນ, ກົມຄວາມປອດໄພນິວເຄລຍແຫ່ງຊາດ ກະຊວງອະນຸລັກສິ່ງແວດລ້ອມຈີນ ກໍໄດ້ເລີ່ມປະຕິບັດແຜນຮັບມືສຸກເສີນລະດັບສອງຕໍ່ສິ່ງແວດລ້ອມໂດຍສະເພາະອາດຈະເກີດສານກຳມັນຕະພາບລັງສີຈາກການທົດລອງນິວເຄລຍຂອງ ສປປ ເກົາຫຼີ. ປັດຈຸບັນ, ສະຖານີຕິດຕາມກວດກາສິ່ງແວດລ້ອມສານກຳມັນຕະພາບລັງສີໂດຍອັດຕະໂນມັດຢູ່ 3 ແຂວງພາກຕາເວັນອອກສຽງເໜືອ ແລະ ແຂວງຊ່ານຕົ່ງ ໄດ້ຈັດຕັ້ງປະຕິບັດດ້ວຍຄວາມຮັບຜິດຊອບສູງ, ຂະນະທີ່ກົມຄວາມປອດໄພນິວເຄລຍແຫ່ງຊາດ ກໍໄດ້ຈັດຕັ້ງການຕິດຕາມກວດກາສານກຳມັນຕະພາບລັງສີຢູ່ເຂດຊາຍແດນພາກເໜືອປະເທດຕົນທັນທີ.
