ວັນທີ 3 ກັນຍານີ້, ເຈົ້າໜ້າທີ່ຕຳຫຼວດເມືອງແປຣງເຟິດ ປະເທດເຢຍລະມັນ ໄດ້ປະກາດວ່າ ສາມາດທຳລາຍລະເບີດບໍ່ທັນແຕກໜ່ວຍໜຶ່ງໜັກ 1,8 ໂຕນ ທີ່ຕົກຄ້າງໃນສະໄໝສົງຄາມໂລກຄັ້ງທີ 2 ຢູ່ເຂດເມືອງດັ່ງກ່າວ ທັງໄດ້ລະບຸວ່າ: ລູກບົມທາງອາກາດນີ້ແມ່ນລະເບີດຮຸ່ນ HC-4000, ຜະລິດໂດຍອັງກິດໃນສະໄໝສົງຄາມໂລກຄັ້ງທີ 2 ໂດຍມັນມີໝື້ລະເບີດ 1,4 ໂຕນ. ປັດຈຸບັນ, ສ່ວນຊະນວນລະເບີດກໍໄດ້ປົດອອກສຳເລັດ.
ຂ່າວລາຍງານຕື່ມວ່າ: ລູກບົມດັ່ງກ່າວຖືກພົບຢູ່ສະຖານທີ່ກໍ່ສ້າງແຫ່ງໜຶ່ງໃນເຂດເມືອງແຟຣງເຟິດ ໃນວັນທີ 30 ສິງຫາຜ່ານມາ ແລະ ຈາກນັ້ນ, ອຳນາດການປົກຄອງທ້ອງຖິ່ນກໍໄດ້ປະກາດຍົກຍ້າຍປະຊາຊົນໃນວັນຕໍ່ມາ ແລະ ໃນໄລຍະ 2 ມື້ ຄືວັນທີ 2-3 ກັນຍານີ້, ໄດ້ຍົກຍ້າຍປະຊາຊົນ 6 ໝື່ນກວ່າຄົນອອກຈາກພື້ນທີ່ຢ່າງຮີບດ່ວນ.