ບຸນວັດທະນະທຳປະເທດບຣິກສ໌ຄັ້ງທຳອິດຈະຈັດຂຶ້ນຢູ່ເມືອງເຊ້ຍເມີນ ສປ ຈີນແຕ່ວັນທີ 15-22 ກັນຍານີ້, ຂະນະທີ່ພິທີເປີດບຸນແລະງານວາງສະແດງຮູບພາບວັດທະນະທຳ ກໍຈະຈັດຂຶ້ນຢູ່ສູນປະຊຸມສາກົນເຊ້ຍເມິນໃນວັນທີ 4 ກັນຍານີ້.
ທ່ານ ເຊ້ຈິ່ນອິ່ງ ຫົວໜ້າກົມພົວພັນຕ່າງປະເທດຮັບຜິດຊອບວຽກງານວັດທະນະທຳຂອງກະຊວງວັດທະນະທຳຈີນ ກ່າວໃນພິທີຖະແຫຼງຂ່າວທີ່ຈັດຂຶ້ນຢູ່ສູນຂ່າວກອງປະຊຸມຜູ້ນຳປະເທດບຣິກສ໌ວ່າ, ບຸນວັດທະນະທຳປະເທດບຣິກສ໌ ຈະເນັ້ນຫົວຂໍ້ "ເຊື່ອມໂຍງອາລະຍະທຳ ແລະປະສານໃຈປະຊາຊົນ" ໂດຍຈະເຊີນສິລະປິນຂອງ 5 ປະເທດບຣິກສ໌ 210 ກວ່າທ່ານຮ່ວມສະແດງຢູ່ໂຮງລະຄອນ, ຢູ່ກາງແຈ້ງ. ຂະນະດຽວກັນ ກໍຈະມີການບັນຍາຍຂອງມະຫາອາຈານສິລະປະ, ງານວາງສະແດງຫົວຂໍ້ສະເພາະ, ງານວາງສະແດງຮູບເງົາປະເທດບຣິກສ໌ ແລະກິດຈະກຳອື່ນໆລວມ 30 ກວ່າເທື່ອຢູ່ເມືອງເຊ້ຍເມິນ.
ນອກນີ້, ຮູບເງົາເລື່ອງ "ເວລາໄປໃສແລ້ວ" ທີ່ຖ່າຍທຳໂດຍ 5 ປະເທດບຣິກສ໌ເປັນຄັ້ງທຳອິດນັ້ນ ຈະສາຍຢູ່ທົ່ວໂລກໃນໄວໆນີ້ ເພື່ອໃຫ້ຜູ້ຊົມທົ່ວໂລກໄດ້ເຫັນຮີດຄອງປະເພນີວັດທະນະທຳແລະການຫັນປ່ຽນຊີວິດການເປັນຢູ່ຂອງປະຊາຊົນ 5 ປະເທດບຣິກສ໌.