ລັດວິສາຫະກິດທາງລົດໄຟຈີນແຈ້ງໃຫ້ຊາບວ່າ, ວັນທີ 31 ສິງຫາຜ່ານມາ ເປັນມື້ສຸດທ້າຍຂອງໄລຍະຂົນສົ່ງຜູ້ໂດຍສານໃນຍາມພັກສົກຮຽນ 2017 ໂດຍຕະຫຼອດໄລຍະ 62 ມື້ສາມາດຂົນສົ່ງຜູ້ໂດຍສານໄດ້ 592 ລ້ານເທື່ອຄົນ ເຊິ່ງເພີ່ມຂຶ້ນປະມານ 51 ລ້ານເທື່ອຄົນ ຄື 9,6% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະສະເລ່ຍແລ້ວ 9 ລ້ານເທື່ອຄົນຕໍ່ມື້ເຊິ່ງເປັນສະຖິຕິສູງສຸດໃນປະຫວັດສາດ ໂດຍສະເພາະໃນວັນທີ 26 ສິງຫາຜ່ານມາ ເປັນມືືີ້ທີ່ຂົນສົ່ງຜູ້ໂດຍສານຫຼາຍທີ່ສຸດ ຄືບັນລຸເຖິງ 11 ລ້ານເທື່ອຄົນ ເຊິ່ງຫຼາຍກວ່າມື້ທີ່ຂົນສົ່ງຜູ້ໂດຍສານຫຼາຍທີ່ສຸດໃນປີຜ່ານມາເຖິງ 5 ແສນ 7 ໝື່ນເທື່ອຄົນ.
ທັງນີ້, ຜູ້ໂດຍສານທີ່ຂີ່ລົດໄຟຄວາມໄວສູງນັ້ນ ໄດ້ເພີ່ມຂຶ້ນຢ່າງຫຼວງຫຼາຍ ແລະລົດໄຟຄວາມໄວສູງກໍໄດ້ກາຍເປັນທາງເລືອກທຳອິດຂອງຜູ້ໂດຍສານ. ໃນໄລຍະພັກສົກຮຽນປີນີ້, ທາງລົດໄຟຄວາມໄວສູງທົ່ວປະເທດໄດ້ຂົນສົ່ງຜູ້ໂດຍສານເກືອບ 330 ລ້ານເທື່ອຄົນ ເພີ່ມຂຶ້ນ 50 ລ້ານເທື່ອຄົນເມື່ອທຽບໃສ່ໄລຍະດຽວກັນຂອງປີຜ່ານມາ ຄື 18,1% ແລະສະເລ່ຍແລ້ວ 5 ລ້ານເທື່ອຄົນຕໍ່ມື້ ກວມ 55,7% ຂອງຜູ້ໂດຍສານທັງໝົດ.