ໂຄສົກອຳນາດການປົກຄອງລັດອູຕາ ປະເທດອິນເດຍ ໄດ້ເປີດເຜີຍໃນວັນທີ 4 ກັນຍານີ້ວ່າ: ນັບແຕ່ວັນທີ 20 ກໍລະກົດຫາວັນທີ 21 ສິງຫາຜ່ານມາ, ໂຮງໝໍລັດແຫ່ງໜຶ່ງຢູ່ເມືອງຟາຣຸກຄາບັດ, ມີເດັກນ້ອຍເກີດໃໝ່ 30 ຄົນເສຍຊີວິດໃນຫ້ອງ ICU ແລະເດັກນ້ອຍ 19 ຄົນເສຍຊີວິດໃນເວລາປະສູດ. ປັດຈຸບັນ, ອຳນາດການປົກຄອງລັດຕົນໄດ້ປົດຕຳແໜ່ງ 3 ຄົນ ເປັນຕົ້ນ ຜູ້ບໍລິຫານການປົກຄອງເມືອງ ແລະ ຫົວໜ້າແພດປະຈຳໂຮງໝໍ ທັງຈະສືບສວນ-ສອບສວນເຫດການດັ່ງກ່າວອີກ.
ບົດລາຍງານກວດກາເບື້ອງຕົ້ນຊີ້ໃຫ້ເຫັນວ່າ, ເດັກນ້ອຍ 30 ຄົນໄດ້ເສຍຊີວິດຈາກການຂາດອາກາດຫາຍໃຈ ເນື່ອງຈາກການສະໜອງອົກຊີແຊນບໍ່ພໍ, ສ່ວນສາເຫດການຕາຍຂອງເດັກອີກ 19 ຄົນຍັງບໍ່ໄດ້ປະກາດອອກມາເທື່ອ. ຂະນະທີ່ພໍ່ແມ່ຂອງເດັກທີ່ເສຍຊີວິດເຫຼົ່ານັ້ນ ກໍຢືນຢັນວ່າ ການສະໜອງອົກຊີແຊນ ແລະ ຢາໃຫ້ໂຮງໝໍບໍ່ທັນການນັ້ນເປັນສາເຫດພາໃຫ້ເດັກເສຍຊີວິດ.
ເມື່ອບໍ່ດົນມານີ້, ເປັນເວລາຫຼາຍເທື່ອແລ້ວທີ່ຢູ່ອິນເດຍໄດ້ເກີດເຫດເດັກເສຍຊີວິດພ້ອມກັນຫຼາຍຄົນໃນໂຮງໝໍ.